ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠤᠢ ᠰᠢᠭᠤᠢ ᠬᠢᠭᠡᠳ ᠲᠡᠯ᠎ᠡ ᠨᠤᠳᠤᠭ — ᠮᠤᠩᠭᠤᠯ ᠭᠡᠷ ᠤᠨ ᠰᠤᠶᠤᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-07-02
     ᠤᠯᠠᠷᠢᠯ ᠤᠨ ᠰᠠᠶᠢᠬᠠᠨ ᠵᠤᠨ ᠳᠠᠭᠠᠨ ᠠᠭᠤᠳᠠᠮ ᠲᠡᠨᠢᠭᠦᠨ ᠮᠤᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠲᠤ ᠮᠤᠩᠭᠤᠯ ᠭᠡᠷ  ᠤᠳ ᠬᠡᠮᠡᠷᠯᠢᠭ ᠬᠡᠪᠢᠰ ᠲᠤ ᠰᠢᠬᠢᠳᠦᠭᠰᠡᠨ ᠰᠤᠪᠤᠳ ᠰᠢᠭ᠋ ᠴᠠᠶᠢᠯᠵᠠᠨ ᠬᠠᠷᠠᠬᠳᠠᠬᠤ ᠳᠤ ᠰᠡᠳᠬᠢᠯ ᠳᠤ ᠶᠠᠭᠤᠳᠠᠢ ᠪᠠᠭ᠋ᠠᠳᠠᠢ ᠪᠢᠯᠡ᠃ ᠰᠦᠨ ᠠᠰᠬᠠᠷᠠᠬᠤ ᠮᠡᠲᠦ ᠦᠦᠷ ᠤᠨ ᠲᠤᠶᠠᠭ᠎ᠠ ᠰᠠᠴᠤᠷᠠᠬᠤ ᠳᠤ ᠴᠦ᠂ ᠨᠠᠷᠡ ᠲᠠᠰᠢᠵᠦ ᠠᠭᠤᠯᠠ  ᠶᠢᠨ ᠲᠤᠯᠤᠭᠠᠢ ᠰᠢᠭᠦᠷᠡᠬᠦ ᠳᠤ ᠴᠦ᠂ ᠨᠠᠪᠴᠢ ᠴᠡᠴᠡᠭ ᠢ ᠰᠡᠷᠮᠡᠭᠦᠯᠬᠦ ᠮᠠᠷ ᠮᠠᠷ ᠰᠢᠪᠡᠷᠡᠭᠡ ᠪᠤᠷᠤᠭᠠᠨ ᠳᠤ ᠴᠦ᠂ ᠨᠠᠮᠠᠢᠢ ᠴᠢᠮᠠᠢᠢ ᠦᠨᠤᠰᠤᠨ ᠢᠯᠪᠢᠬᠦ ᠰᠡᠷ ᠰᠡᠷ ᠡᠶᠡᠷᠡᠭᠦᠨ ᠰᠠᠯᠬᠢᠨ ᠳᠤ ᠴᠦ᠂ ᠮᠤᠩᠭᠤᠯ ᠭᠡᠷ ᠲᠡᠯ᠎ᠡ ᠨᠤᠳᠤᠭ ᠤᠨ ᠠᠮᠢᠳᠤᠷᠡᠯ  ᠤᠨ ᠠᠯᠳᠠᠨ ᠭᠠᠳᠠᠰᠦ ᠰᠢᠭ᠋ ᠮᠠᠯᠴᠢᠨ ᠬᠦᠮᠦᠨ ᠤ ᠲᠤᠯᠠᠭᠠᠨ ᠦᠯᠦᠭᠡᠢ᠂ ᠬᠦᠮᠦᠨ ᠲᠦᠷᠦᠯᠬᠢᠲᠡᠨ ᠤ ᠬᠦᠰᠡᠯᠡᠩ ᠳᠠᠬᠢ ᠪᠠᠶᠢᠭᠠᠯᠢ ᠪᠤᠯᠤᠨ ᠬᠦᠮᠦᠨ ᠤ ᠡᠶ᠎ᠡ ᠵᠤᠬᠢᠴᠠᠯ ᠤᠨ ᠭᠤᠸ᠎ᠠ ᠬᠤᠷᠸ᠎ᠠ ᠪᠤᠯᠬᠤ ᠠᠵᠢ︕      ᠮᠤᠩᠭᠤᠯ ᠭᠡᠷ ᠪᠤᠯ ᠮᠤᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠤᠨ ᠡᠯ᠎ᠡ ᠨᠡᠭᠦᠳᠠᠯᠴᠢᠨ ᠦᠨᠳᠦᠰᠦᠲᠡᠨ ᠤ ᠬᠠᠮᠲᠦ ᠪᠠᠷ ᠡᠭᠦᠳᠴᠦ᠂ ᠵᠠᠯᠭᠠᠮᠵᠢᠯᠠᠨ ᠬᠦᠭᠵᠢᠭᠦᠯᠵᠦ ᠢᠷᠡᠭᠰᠡᠨ ᠨᠢᠭᠡ ᠵᠦᠢᠯ ᠤᠨ ᠬᠤᠨᠤᠭ ᠪᠠᠭᠤᠴᠡ ᠶᠢᠨ ᠬᠡᠯᠪᠡᠷᠢ ᠮᠦᠨ᠃ ᠡᠷᠲᠡᠨ ᠤ ᠾᠦᠩᠨᠦ᠂ ᠲᠢᠶᠧ ᠯᠧ ︵ᠲᠡᠷᠭᠡ︶᠂ ᠭᠤᠤᠴᠧ᠂ ᠤᠶᠢᠭᠤᠷ ᠵᠡᠷᠭᠡ ᠦᠨᠳᠦᠰᠦᠲᠡᠨ ᠴᠦ ᠡᠷᠲᠡᠨ ᠤ ᠮᠠᠶ᠋ᠢᠭ  ᠤᠨ ᠮᠤᠩᠭᠤᠯ ᠭᠡᠷ ᠲᠠᠢ ᠪᠠᠶᠢᠵᠠᠢ᠃ ᠡᠨᠡ ᠨᠢ ᠲᠡᠯ᠎ᠡ ᠨᠤᠳᠤᠭ ᠲᠤ ᠵᠦᠩᠶᠦ᠋ᠸᠠᠨ ᠤᠷᠤᠨ ᠤ ᠦᠨᠳᠦᠰᠦᠨ ᠪᠠᠷᠢᠯᠭ᠎ᠠ  ᠶᠢᠨ ᠮᠠᠲ᠋ᠧᠷᠢᠶᠡᠯ᠂ ᠵᠢᠱᠢᠶᠡᠯᠡᠪᠡᠯ᠂ ᠲᠦᠫᠢ᠂ ᠸᠠᠭᠠᠷ ᠲᠤᠭᠤᠰᠬ᠎ᠠ᠂ ᠴᠠᠭᠠᠨ ᠴᠤᠬᠤᠢ ᠵᠡᠷᠭᠡ ᠲᠤᠳᠠᠮᠠᠭ ᠤᠨ ᠲᠡᠭᠡᠷ᠎ᠡ ᠤᠰᠤ ᠪᠡᠯᠴᠢᠭᠡᠷ ᠤᠨ ᠪᠠᠶᠢᠲᠡᠯ ᠢ ᠦᠨᠳᠦᠰᠦᠯᠡᠵᠦ ᠨᠡᠭᠦᠳᠡᠯᠯᠠᠨ ᠰᠠᠭᠤᠷᠢᠰᠢᠳᠠᠭ ᠨᠡᠭᠦᠳᠡᠯᠴᠢᠨ ᠦᠨᠳᠦᠰᠦᠲᠡᠨ ᠳᠤ ᠠᠪᠴᠦ ᠬᠡᠯᠡᠪᠡᠯ᠂ ᠰᠠᠭᠤᠷᠢᠰᠢᠯ ᠤᠨ ᠪᠠᠶᠢᠰᠢᠩ ᠭᠡᠷ ᠨᠢ ᠨᠡᠭᠦᠲᠡᠯᠯᠡᠬᠦ ᠳᠤ ᠲᠦᠭᠦᠮ ᠦᠭᠡᠢ᠂ ᠡᠳ᠋ ᠮᠠᠲ᠋ᠧᠷᠢᠶᠡᠯ ᠤᠨ ᠦᠷᠲᠡᠭ ᠦᠨᠳᠦᠷ ᠪᠠᠶᠢᠳᠠᠭ ᠠᠴᠠ ᠪᠤᠯᠤᠭᠰᠡᠨ ᠶᠤᠮ᠃ ᠮᠤᠩᠭᠤᠯ ᠭᠡᠷ ᠤᠨ ᠮᠠᠲ᠋ᠧᠷᠢᠶᠡᠯ ᠳᠤ ᠲᠦᠫᠢ᠂ ᠸᠠᠭᠠᠷ ᠲᠤᠭᠤᠰᠬ᠎ᠠ᠂ ᠲᠠᠮᠦᠷᠯᠢᠭ ᠤᠨ ᠵᠦᠢᠯ ᠢ ᠬᠡᠷᠡᠭᠰᠡᠲᠡᠭ ᠦᠭᠡᠢ᠃ ᠵᠦᠪᠭᠡᠨ ᠬᠡᠰᠡᠭ ᠮᠤᠳᠤᠨ ᠮᠠᠲ᠋ᠧᠷᠢᠶᠡᠯ᠂ ᠢᠰᠡᠭᠡᠢ ᠪᠤᠯᠤᠨ ᠰᠤᠷ᠂ ᠬᠢᠯᠭᠠᠰᠦ ᠯᠡ ᠬᠡᠷᠡᠭᠰᠡᠨ᠎ᠡ᠃ ᠡᠲᠡᠭᠡᠷ ᠮᠠᠲ᠋ᠧᠷᠢᠶᠡᠯ ᠨᠢ ᠴᠦᠮ ᠲᠡᠯ᠎ᠡ ᠨᠤᠳᠤᠭ ᠤᠨ ᠭᠠᠷᠤᠯᠲᠡ ᠪᠢᠯᠡ᠃ ᠦᠨᠦᠳᠤᠷ ᠪᠤᠯᠳᠠᠯ᠎ᠠ ᠮᠤᠩᠭᠤᠯ᠂ ᠲᠠᠭᠤᠷ᠂ ᠡᠸᠠᠩᠭᠢ᠂ ᠬᠠᠰᠠᠭ᠂ ᠬᠢᠷᠬᠢᠰ᠂ ᠲᠠᠵᠢᠺ ᠵᠡᠷᠭᠡ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠮᠦᠨ ᠯᠡ ᠮᠤᠩᠭᠤᠯ ᠭᠡᠷ ᠬᠡᠷᠡᠭᠯᠡᠵᠦ ᠪᠤᠢ᠃ ᠪᠠᠰᠡ ᠵᠠᠷᠢᠮ ᠮᠤᠩᠭᠤᠯ ᠭᠡᠷ ᠢ ᠬᠠᠰᠠᠭ ᠲᠡᠷᠭᠡᠨ ᠲᠡᠭᠡᠷ᠎ᠡ ᠴᠤᠬᠴᠠᠯᠠᠭᠰᠡᠨ ᠪᠠᠶᠢᠳᠠᠭ᠃ ᠡᠭᠦᠨ ᠢ ᠭᠡᠷ ᠲᠡᠷᠭᠡ ᠪᠤᠶᠦ ᠪᠦᠷᠢᠶᠡᠰᠦᠲᠦ ︵ᠮᠤᠬᠤᠯᠠᠭ︶ ᠲᠡᠷᠭᠡ ᠬᠡᠨ᠎ᠡ᠃ ᠲᠡᠷᠡ ᠨᠢ ᠨᠡᠭᠦᠲᠡᠯᠯᠠᠨ ᠰᠢᠯᠵᠢᠬᠦ ᠳᠤ ᠲᠦᠭᠦᠮ ᠲᠦᠲᠡ᠂ ᠡᠷᠲᠡᠨ ᠦᠶ᠎ᠡ ᠶᠢᠨ ᠨᠡᠭᠦᠲᠡᠯ ᠦᠨᠳᠦᠰᠦᠲᠡᠨ ᠤ ᠨᠡᠭᠦᠲᠡᠯᠯᠠᠨ ᠮᠠᠯᠵᠢᠬᠤ ᠳᠤ ᠮᠠᠰᠢᠲᠡ ᠲᠤᠬᠢᠷᠠᠬᠰᠡᠨ ᠪᠠᠶᠢᠳᠠᠭ᠃ ᠰᠡᠭᠦᠯ ᠳᠤᠨᠢ ᠮᠤᠩᠭᠤᠯ ᠭᠡᠷ ᠢ ᠨᠡᠶᠢᠲᠡᠮ ᠬᠡᠷᠡᠭᠯᠡᠭᠰᠡᠨ ᠴᠦ ᠡᠶᠢᠮᠦᠷᠬᠦ ᠮᠤᠬᠤᠯᠠᠭ ᠲᠡᠷᠭᠡ ᠨᠢ ᠤᠨᠴᠠᠭᠠᠢ ᠬᠡᠷᠡᠭᠯᠡᠭᠡᠨ ᠤ ᠱᠠᠭᠠᠷᠳᠠᠯᠭ᠎ᠠ ᠪᠠᠷ ᠬᠠᠳᠠᠭᠠᠯᠠᠬᠳᠠᠭᠰᠠᠭᠠᠷ ᠢᠷᠡᠪᠡ᠃ ᠮᠤᠬᠤᠯᠠᠭ ᠲᠡᠷᠭᠡ ᠨᠢ ᠬᠤᠯᠠ ᠠᠶᠠᠨ ᠳᠤ ᠶᠠᠪᠤᠬᠤ᠂ ᠴᠡᠷᠢᠭ ᠲᠠᠶᠢᠨ ᠳᠤ ᠮᠤᠷᠳᠠᠬᠤ᠂ ᠰᠠᠬᠢᠭᠤᠰᠦ ᠪᠤᠷᠬᠠᠨ ᠲᠠᠬᠢᠬᠤ᠂ ᠴᠡᠷᠢᠭ ᠪᠠᠭᠤᠳᠠᠯᠯᠠᠵᠦ ᠬᠠᠯᠬᠠᠪᠴᠢ ᠪᠤᠯᠭᠠᠬᠤ ᠵᠡᠷᠭᠡ ᠳᠤ ᠪᠦᠷ ᠬᠡᠷᠡᠭᠴᠡᠭᠡ ᠲᠠᠢ ᠪᠠᠶᠢᠪᠡ᠃ ᠴᠢᠩᠭᠢᠰ ᠬᠠᠭᠠᠨ ᠪᠠᠷᠠᠭᠤᠨᠰᠢ ᠲᠠᠶᠢᠯᠠᠬᠤ ᠳᠤ᠂ ᠡᠶᠢᠮᠦᠷᠬᠦ ᠮᠤᠬᠤᠯᠠᠭ ᠲᠡᠷᠭᠡ ᠶᠢ ᠠᠪᠴᠦ ᠶᠠᠪᠤᠵᠦ ᠪᠠᠶᠢᠵᠠᠢ᠃      ᠮᠤᠩᠭᠤᠯ ᠭᠡᠷ ᠤᠨ ᠲᠦᠷᠦᠯ ᠵᠦᠢᠯ ᠨᠢ ᠭᠠᠵᠠᠷ ᠨᠤᠳᠤᠭ ᠪᠡ ᠴᠠᠭ ᠬᠤᠭᠤᠴᠠᠭᠠᠨ ᠤ ᠢᠯᠭᠠᠭ᠎ᠠ ᠲᠠᠢ ᠪᠠᠶᠢᠳᠠᠭ᠃      ᠡᠷᠲᠡᠨ ᠤ ᠦᠶ᠎ᠡ ᠶᠢᠨ ᠪᠡ ᠤᠷᠴᠢᠨ ᠦᠶ᠎ᠡ ᠶᠢᠨ ᠮᠤᠩᠭᠤᠯ ᠭᠡᠷ ᠤᠨ ᠢᠯᠭᠠᠭ᠎ᠠ ᠨᠢ ᠪᠤᠯ ᠡᠷᠲᠡᠨ ᠤ ᠮᠤᠩᠭᠤᠯ ᠭᠡᠷ ᠤᠷᠴᠢᠨ ᠦᠶ᠎ᠡ ᠶᠢᠨ ᠬᠢ ᠶᠢᠨ ᠪᠤᠳᠤᠪᠡᠯ ᠦᠨᠳᠦᠷ ᠢᠶᠠᠷ ᠢᠶᠠᠨ ᠨᠢᠭᠡ ᠲᠠᠬᠢᠨ ᠬᠢᠷᠢᠲᠠᠢ᠂ ᠪᠠᠷᠤᠭ 5 ᠮᠧᠲᠷ ᠦᠨᠳᠦᠷ ᠶᠤᠮ᠃ ᠰᠠᠯᠬᠢ ᠰᠢᠭᠤᠷᠭᠠᠨ᠂ ᠴᠠᠰᠦ ᠪᠤᠷᠤᠭᠠᠨ ᠳᠤ ᠲᠡᠰᠪᠦᠷᠢ ᠮᠠᠭᠤᠳᠠᠢ᠂ ᠨᠡᠭᠦᠵᠦ ᠪᠠᠷᠢᠬᠤ ᠳᠤ ᠲᠦᠭᠦᠮ ᠦᠭᠡᠢ᠃ ᠤᠷᠴᠢᠨ ᠦᠶ᠎ᠡ ᠶᠢᠨ ᠮᠤᠩᠭᠤᠯ ᠭᠡᠷ ᠨᠢ ᠪᠠᠷᠢᠯᠭ᠎ᠠ ᠶᠢᠨ ᠤᠨᠤᠯ ᠤᠨ ᠵᠢᠯᠤᠭᠤᠳᠤᠯᠭ᠎ᠠ ᠪᠠᠷ ᠤᠯᠠᠮ ᠲᠡᠭᠦᠯᠲᠡᠷᠵᠢᠭᠦᠯᠵᠦ᠂ ᠤᠯᠠᠮ ᠲᠡᠰᠪᠦᠷᠢᠲᠠᠢ᠂ ᠬᠡᠷᠡᠭᠯᠡᠬᠦ ᠳᠤ ᠬᠠᠪᠤᠳᠠᠢ᠂ ᠦᠵᠡᠬᠦ ᠳᠤ ᠡᠪᠯᠢᠭ ᠮᠦᠷᠲᠡᠭᠡᠨ ᠡᠳ᠋ ᠮᠠᠲ᠋ᠧᠷᠢᠶᠡᠯ ᠠᠷᠪᠢᠯᠡᠵᠦ ᠨᠡᠭᠦᠵᠦ ᠪᠠᠭᠤᠬᠤ ᠳᠤ ᠮᠠᠰᠢ ᠲᠦᠭᠦᠮ ᠪᠤᠯᠵᠠᠢ᠃      ᠮᠤᠩᠭᠤᠯ ᠭᠡᠷ ᠨᠢ ᠮᠠᠲ᠋ᠧᠷᠢᠶᠡᠯ ᠤᠨ ᠬᠤᠪᠢ ᠳᠤ ᠶᠡᠷᠦ ᠳᠡᠭᠡᠨ ᠯᠡ ᠢᠰᠡᠭᠡᠢ᠂ ᠲᠡᠭᠡᠰᠦ ︵ᠬᠤᠰᠢᠯᠠᠩ︶᠂ ᠮᠤᠲᠦ ᠭᠤᠷᠪᠡ ᠪᠠᠷ ᠪᠦᠷᠢᠯᠳᠤᠳᠡᠭ᠃ ᠮᠤᠲᠦ ᠶᠢ ᠨᠢ ᠲᠤᠳᠤᠭᠠᠲᠦ ᠪᠦᠳᠦᠴᠡ᠂ ᠢᠰᠡᠭᠡᠢ ᠶᠢ ᠨᠢ ᠭᠠᠳᠠᠷ ᠪᠦᠲᠦᠴᠡ ᠭᠡᠵᠦ ᠪᠤᠯᠤᠨ᠎ᠡ᠃ ᠲᠤᠳᠤᠭᠠᠲᠦ ᠪᠦᠲᠦᠴᠡ ᠨᠢ ᠲᠤᠭᠤᠨᠤ ︵ᠬᠡᠬᠡᠪᠴᠢ︶᠂ ᠤᠨᠢ ︵ᠲᠤᠭᠤᠨᠤ ᠪᠤᠯᠤᠨ ᠬᠠᠨᠠᠨ ᠤ ᠠᠭᠤᠯᠵᠠᠷ ᠤᠨ ᠮᠤᠲᠦ᠂ ᠮᠤᠩᠭᠤᠯ ᠭᠡᠷ ᠤᠨ ᠲᠡᠭᠡᠷᠡᠬᠢ ᠬᠡᠰᠡᠭ ᠤᠨ ᠲᠤᠯᠭᠠᠭᠤᠷᠢᠯᠠᠯ ᠪᠤᠯᠳᠠᠭ︶᠂ ᠬᠠᠨ᠎ᠡ ︵ᠮᠤᠩᠭᠤᠯ ᠭᠡᠷ ᠤᠨ ᠲᠤᠤᠷᠡᠲᠦ ᠭᠡᠰᠡᠭ ᠤᠨ ᠲᠤᠭᠤᠶᠢᠯᠠᠪᠦᠷᠢ ᠶᠢᠨ ᠲᠡᠩᠴᠡᠭᠦᠷᠢ ᠮᠤᠲᠦ︶ ᠵᠡᠷᠭᠡ ᠭᠤᠷᠪᠠᠨ ᠭᠡᠰᠡᠭ ᠢᠶᠠᠷ ᠪᠦᠷᠢᠯᠳᠤᠳᠡᠭ᠃ ᠭᠠᠳᠠᠷ ᠪᠦᠲᠦᠴᠡ ᠨᠢ ᠡᠷᠦᠭᠡ ︵ᠲᠤᠭᠤᠨᠤ ᠪᠠᠨ ᠪᠦᠲᠡᠭᠡᠲᠡᠭ ᠢᠰᠡᠭᠡᠢ︶᠂ ᠲᠡᠭᠡᠪᠦᠷ ︵ᠤᠨᠢ ᠶᠢ ᠪᠦᠷᠭᠦᠲᠡᠭ ᠢᠰᠡᠭᠡᠢ︶᠂ ᠪᠦᠷᠢᠶᠡᠰᠦ ︵ᠬᠠᠨᠠᠨ ᠤ ᠪᠦᠷᠢᠶᠡᠰᠦ ᠢᠰᠡᠭᠡᠢ︶ ᠪᠤᠯᠤᠨ᠎ᠡ᠃      ᠮᠤᠩᠭᠤᠯ ᠭᠡᠷ ᠤᠨ ᠪᠦᠲᠦᠴᠡ᠂ ᠬᠡᠯᠪᠡᠷᠢ ᠪᠤᠯᠤᠨ ᠪᠠᠷᠢᠯᠭ᠎ᠠ ᠶᠢᠨ ᠮᠠᠲ᠋ᠧᠷᠢᠶᠡᠯ ᠵᠡᠷᠭᠡ ᠨᠢ ᠴᠦᠮ ᠲᠡᠯ᠎ᠡ ᠨᠤᠳᠤᠭ ᠤᠨ ᠠᠮᠢᠳᠤᠷᠡᠯ ᠤᠷᠴᠢᠨ ᠤ ︽ᠪᠤᠬᠢᠷᠳᠤᠯ ᠦᠭᠡᠢ︾ ᠤᠴᠢᠷ ᠶᠤᠰᠤᠨ ᠢ ᠦᠭᠦᠯᠡᠵᠦ ᠪᠠᠶᠢᠳᠠᠭ ᠰᠠᠨ᠃      ᠮᠤᠩᠭᠤᠯ ᠭᠡᠷ ᠤᠨ ᠪᠦᠲᠦᠴᠡ ᠨᠢ ᠲᠤᠭᠤᠨᠤ ᠠᠴᠠ ᠡᠬᠢᠯᠡᠲᠡᠭ᠂ ᠬᠦᠷᠲᠦ ᠰᠢᠭ ᠲᠤᠭᠤᠷᠢᠭ᠂ ᠬᠦᠮᠦᠷᠢᠭᠰᠡᠨ ᠲᠤᠭᠤᠭ᠎ᠠ ᠰᠢᠭ᠋ ᠬᠦᠲᠦᠭᠦᠷ᠃ ᠮᠤᠩᠭᠤᠯ ᠭᠡᠷ ᠤᠨ ᠤᠷᠤᠢ ᠶᠢ ᠶᠡᠪ ᠴᠡᠪ ᠡᠮᠭᠦᠭᠦᠯᠦᠨ ᠲᠠᠭᠠᠷᠠᠭᠤᠯᠤᠭᠰᠡᠨ ᠠᠴᠠ ᠲᠤᠭᠤᠨᠤ ᠶᠢᠨ ᠶᠡᠭᠡ ᠪᠠᠭ᠎ᠠ ᠨᠢ ᠮᠤᠩᠭᠤᠯ ᠭᠡᠷ ᠤᠨ ᠶᠡᠭᠡ ᠪᠠᠭ᠎ᠠ ᠶᠢ ᠰᠢᠢᠳᠪᠦᠷᠢᠯᠡᠲᠡᠭ ᠪᠢᠯᠡ᠃ ᠮᠤᠩᠭᠤᠯ ᠭᠡᠷ ᠤᠨ ᠲᠤᠭᠤᠨᠤ ᠬᠢᠬᠦ ᠳᠤ ᠬᠡᠰᠢᠭᠦᠦ ᠦᠭᠡᠢ ᠮᠤᠲᠦ ᠪᠤᠶᠦ ᠴᠡᠪᠡ ᠦᠭᠡᠢ ᠠᠰᠬᠠᠨ ᠬᠠᠶᠢᠯᠠᠰᠦ᠂ ᠬᠤᠰᠤ ᠪᠤᠶᠦ ᠪᠤᠷᠭᠠᠰᠦ ᠬᠡᠷᠡᠭᠯᠡᠲᠡᠭ᠃ ᠤᠨᠢ ᠪᠤᠯ ᠲᠤᠭᠤᠨᠤ ᠪᠤᠯᠤᠨ ᠲᠤᠤᠷᠡᠪᠴᠢ ᠮᠡᠲᠦ ᠬᠠᠨ᠎ᠡ ᠶᠢᠨ ᠬᠤᠭᠤᠷᠤᠨᠳᠤᠬᠢ ᠵᠠᠯᠭᠠᠪᠦᠷᠢ ᠪᠠᠶᠢᠵᠦ᠂ ᠮᠤᠩᠭᠤᠯ ᠭᠡᠷ ᠤᠨ ᠲᠡᠭᠡᠲᠦ ᠬᠡᠰᠡᠭ ᠤᠨ ᠰᠢᠭᠦᠷ ᠬᠡᠯᠪᠡᠷᠢᠲᠦ ᠪᠦᠲᠦᠴᠡ ᠶᠢ ᠲᠤᠬᠳᠠᠭᠠᠬᠤ ᠲᠤᠯᠠ ᠨᠠᠷᠠᠰᠦ᠂ ᠭᠠᠴᠤᠷ᠎ᠡ ᠪᠤᠶᠦ ᠬᠤᠰᠤ᠂ ᠪᠤᠷᠭᠠᠰᠦ ᠮᠡᠲᠦ ᠶᠢᠨ ᠮᠠᠲ᠋ᠧᠷᠢᠶᠡᠯ ᠢᠶᠠᠷ ᠬᠢᠲᠡᠭ᠃ ᠤᠨᠢ ᠬᠢᠬᠦ ᠮᠤᠳᠤᠨ ᠤ ᠴᠢᠨᠠᠷ ᠪᠤᠯᠤᠨ ᠤᠷᠲᠦ ᠤᠬᠤᠷ᠂ ᠪᠦᠲᠦᠭᠦᠨ ᠨᠠᠷᠢᠨ ᠨᠢ ᠡᠷᠭᠡᠪᠰᠢ ᠵᠢᠭᠲᠡ ᠪᠠᠶᠢᠬᠤ ᠬᠡᠷᠡᠭᠲᠠᠢ᠃      ᠬᠠᠨ᠎ᠡ ᠪᠤᠯ ᠮᠤᠩᠭᠤᠯ ᠭᠡᠷ ᠤᠨ ᠲᠤᠭᠤᠷᠢᠭ ᠪᠦᠲᠦᠴᠡ ᠶᠢᠨ ᠭᠤᠤᠯ ᠴᠤᠬᠴᠡ ᠪᠤᠯᠤᠨ᠎ᠡ᠃ ᠮᠤᠩᠭᠤᠯ ᠭᠡᠷ  ᠤᠨ ᠪᠦᠬᠦ ᠬᠦᠨᠳᠦᠴᠡ ᠶᠢ ᠲᠤᠯᠭᠠᠭᠤᠷᠢᠯᠠᠵᠦ ᠪᠤᠰᠳᠠᠭ ᠠᠴᠠ ᠪᠤᠷᠭᠠᠰᠦ ᠵᠡᠷᠭᠡ ᠮᠤᠲᠦ ᠪᠠᠷ ᠰᠦᠯᠵᠢᠮᠡᠯ ᠬᠡᠯᠪᠡᠷᠢ ᠪᠠᠷ ᠬᠡᠯᠬᠢᠨ ᠲᠤᠭᠤᠷᠢᠭ ᠬᠡᠯᠪᠡᠷᠢ ᠲᠠᠢ ᠪᠤᠯᠬᠤ ᠪᠠᠷ ᠬᠢᠲᠡᠭ᠃ ᠤᠯᠠᠩᠬᠢ ᠳᠠᠭᠠᠨ ᠤᠯᠠᠭᠠᠨ ᠰᠤᠬᠠᠢ ᠵᠡᠷᠭᠡ ᠮᠤᠳᠤᠨ ᠮᠠᠲ᠋ᠧᠷᠢᠶᠡᠯ ᠬᠡᠷᠡᠭᠰᠡᠳᠡᠭ᠃      ᠡᠷᠦᠭᠡ ᠨᠢ ᠪᠠᠷᠢᠮᠵᠢᠶᠠᠲᠦ ᠲᠡᠭᠰᠢ ᠲᠦᠷᠪᠡᠯᠵᠢᠨ ᠬᠡᠯᠪᠡᠷᠢᠲᠠᠢ᠃ ᠭᠤᠷᠪᠠᠨ ᠦᠨᠴᠦᠭ ᠢ ᠨᠢ ᠪᠦᠴᠡ ᠪᠠᠷ ᠲᠤᠪᠬᠢᠨ ᠲᠤᠬᠳᠠᠭᠠᠵᠦ᠂ ᠨᠢᠭᠡ ᠦᠨᠴᠦᠭ ᠢ ᠨᠢ ᠰᠤᠯᠠ ᠲᠠᠯᠪᠢᠵᠦ ᠠᠷᠤᠨᠰᠢ ᠨᠢ ᠲᠡᠳᠠᠪᠡᠯ ᠡᠷᠦᠭᠡ ᠨᠢ ᠭᠤᠷᠪᠠᠯᠵᠢᠨ ᠪᠤᠯᠵᠦ᠂ ᠲᠤᠭᠤᠨᠤ ᠨᠢ ᠤᠩᠭᠤᠶᠢᠨ ᠰᠠᠯᠬᠢ ᠨᠡᠪᠲᠡᠷᠡᠵᠦ᠂ ᠨᠠᠷᠡ ᠲᠤᠰᠬᠤ᠂ ᠤᠳᠤᠭ᠎ᠠ ᠰᠤᠪᠤᠷᠠᠬᠤ ᠪᠤᠯᠤᠨ᠎ᠡ᠃      ᠤᠨᠢ ᠶᠢᠨ ᠬᠡᠰᠡᠭ ᠢ ᠪᠠᠰᠡ ᠭᠡᠷ ᠤᠨ ᠠᠳᠠᠭᠠᠷ ᠬᠡᠵᠦ ᠪᠤᠯᠤᠨ᠎ᠡ᠃ ᠬᠡᠷ ᠤᠨ ᠠᠳᠠᠭᠠᠷ ᠨᠢ ᠡᠮᠦᠨ᠎ᠡ ᠬᠤᠶᠢᠨ᠎ᠡ ᠬᠤᠶᠠᠷ ᠬᠡᠰᠡᠭ ᠢᠶᠠᠷ ᠪᠦᠷᠢᠯᠳᠤᠵᠦ᠂ ᠲᠡᠭᠷᠢ ᠬᠦᠢᠲᠡᠷᠡᠪᠡᠯ ᠬᠤᠶᠠᠷ ᠲᠠᠪᠬᠤᠷ ᠢᠰᠡᠭᠡᠢ ᠪᠦᠷᠢᠵᠦ᠂ ᠰᠠᠶᠢᠨ ᠢᠰᠡᠭᠡᠢ ᠶᠢ  ᠨᠢ ᠭᠠᠳᠠᠭᠤᠷ ᠨᠢ ᠪᠦᠷᠢᠲᠡᠭ᠃      ᠬᠠᠨᠠᠨ ᠤ ᠬᠡᠰᠡᠭ ᠢ ᠪᠦᠷᠢᠶᠠᠰᠦ ᠬᠡᠲᠡᠭ᠃ ᠤᠷᠳᠤᠯᠵᠢᠨ ᠲᠦᠷᠪᠠᠨ ᠬᠡᠰᠡᠭ ᠢᠶᠠᠷ ᠪᠦᠷᠢᠯᠳᠤᠳᠡᠭ᠃      ᠮᠤᠩᠭᠤᠯ ᠭᠡᠷ ᠤᠨ ᠬᠠᠭᠠᠯᠭᠠᠨ ᠤ ᠬᠦᠷᠢᠶ᠎ᠡ ᠪᠤᠶᠦ ᠬᠠᠳᠠᠪᠴᠢ ᠶᠢᠨ ᠦᠨᠳᠦᠷ ᠨᠢ ᠬᠠᠨ᠎ᠠ ᠲᠠᠢ ᠪᠠᠨ ᠴᠢᠴᠠᠦ ᠪᠠᠶᠢᠳᠠᠭ᠃ ᠡᠷᠲᠡᠨ ᠤ ᠮᠤᠩᠭᠤᠯ ᠭᠡᠷ ᠨᠢ ᠵᠦᠪᠭᠡᠨ ᠢᠰᠡᠭᠡᠢ ᠤᠷᠬᠢᠭᠤᠯ ᠲᠠᠢ᠂ ᠮᠤᠳᠤᠨ ᠬᠠᠭᠠᠯᠭ᠎ᠠ ᠪᠠᠶᠢᠳᠠᠭ ᠦᠭᠡᠢ᠂ ᠡᠲᠦᠭᠡ ᠶᠢᠨ ᠮᠤᠩᠭᠤᠯ ᠭᠡᠷ ᠤᠨ ᠬᠠᠭᠠᠯᠭ᠎ᠠ ᠪᠤᠯᠤᠨ ᠤᠷᠬᠢᠭᠤᠯ ᠢ ᠤᠯᠠᠷᠢᠯ ᠤᠨ ᠡᠭᠡᠯᠵᠢᠯᠡᠯ ᠢᠶᠠᠷ ᠬᠡᠷᠡᠭᠯᠡᠲᠡᠭ᠃ ᠤᠳᠤᠮᠰᠢᠯᠲᠦ ᠢᠰᠡᠭᠡᠢ ᠤᠷᠬᠢᠭᠤᠯ ᠲᠡᠭᠡᠷ᠎ᠡ ᠶᠠᠩᠵᠦ ᠪᠦᠷᠢ ᠶᠢᠨ ᠭᠤᠶᠦ ᠰᠠᠶᠢᠬᠠᠨ ᠬᠡ ᠤᠭᠠᠯᠵᠠ᠂ ᠴᠡᠴᠡᠭ ᠨᠠᠪᠴᠢ᠂ ᠠᠮᠢᠳᠠᠨ ᠰᠢᠪᠠᠭᠤ᠂ ᠡᠭᠦᠯᠡᠨ ᠭᠡ᠂ ᠠᠯᠤᠬᠠᠨ ᠬᠡ ᠵᠡᠷᠭᠡ ᠶᠢ ᠤᠷᠠᠯᠠᠬᠰᠡᠨ ᠪᠠᠶᠢᠳᠠᠭ᠃      ᠡᠭᠦᠲᠡᠨ ᠤ ᠤᠷᠬᠢᠭᠤᠯ ᠤᠨ ᠲᠡᠭᠡᠷ᠎ᠡ ᠲᠡᠯ᠎ᠡ ᠳᠤ ᠤᠷᠳᠤᠯᠵᠢᠨ ᠬᠡᠯᠪᠡᠷᠢᠲᠠᠢ ᠵᠢᠵᠢᠭ ᠤᠷᠬᠢᠭᠤᠯ ᠢ ︽ᠲᠤᠳᠤᠭᠤ︾ ᠬᠡᠲᠡᠭ᠃ ᠡᠨᠡ ᠨᠢ ᠭᠡᠷ ᠤᠨ ᠠᠳᠠᠭᠠᠷ ᠪᠤᠤᠯᠨ ᠤᠷᠬᠢᠭᠤᠯ ᠤᠨ ᠬᠤᠭᠤᠷᠤᠨᠳᠤᠬᠢ ᠵᠠᠪᠰᠡᠷ ᠢ ᠬᠠᠯᠬᠠᠯᠠᠳᠠᠭ᠃ ᠮᠤᠩᠭᠤᠯ ᠭᠦᠮᠦᠨ ᠤ ᠲᠡᠳᠬᠠᠯ ᠢᠶᠠᠷ ᠪᠤᠯ ᠮᠤᠩᠭᠤᠯ ᠭᠡᠷ ᠤᠨ ᠪᠤᠱᠤᠭ᠎ᠠ ᠶᠢ ᠠᠶᠢᠯ ᠭᠡᠷ ᠤᠨ ᠪᠡᠯᠭᠡᠲᠡᠯ ᠪᠤᠯᠭᠠᠳᠠᠭ ᠤᠴᠢᠷ  ᠠᠴᠠ ᠪᠤᠱᠤᠭ᠎ᠠ ᠶᠢ ᠵᠠᠶᠢᠳᠠᠯᠡᠵᠦ ᠵᠤᠬᠰᠤᠬᠤ ᠪᠤᠶᠦ ᠲᠡᠭᠡᠷ᠎ᠡ ᠨᠢ ᠬᠢᠰᠬᠢᠬᠦ ᠶᠢ ᠤᠨᠴᠡ ᠴᠡᠭᠡᠷᠯᠡᠲᠡᠭ ᠪᠢᠯᠡ᠃ ᠲᠤᠳᠤᠭᠤ  ᠨᠢ ᠪᠤᠯ ᠦᠷ᠎ᠡ ᠬᠡᠦᠭᠡᠳ ᠦᠷᠡᠵᠢᠵᠦ ᠦᠨᠳᠦᠰᠦ ᠬᠠᠤᠬᠤᠬᠤ ᠶᠢ ᠪᠡᠯᠭᠡᠲᠡᠲᠡᠭ ᠤᠴᠢᠷ ᠠᠴᠠ ᠲᠡᠭᠦᠨ ᠢ ᠮᠠᠰᠢᠲᠡ ᠤᠷᠠᠯᠠᠨ ᠭᠤᠶᠤᠯᠠᠳᠠᠭ ᠪᠢᠯᠡ᠃      ᠦᠨᠦᠳᠤᠷ ᠤᠨ ᠮᠤᠩᠭᠤᠯ ᠭᠡᠷ ᠨᠢ ᠨᠢᠭᠡᠨ ᠵᠦᠢᠯ ᠤᠨ ᠲᠡᠦᠭᠡ ᠶᠢᠨ ᠲᠤᠷᠠᠰᠤᠮᠵᠢ ᠪᠤᠶᠦ ᠰᠤᠶᠤᠯ ᠤᠨ ᠪᠡᠯᠭᠡ ᠲᠡᠮᠲᠡᠭ ᠪᠤᠯᠵᠦ ᠪᠠᠶᠢᠨ᠎ᠡ᠃ ᠦᠪᠡᠷᠲᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠮᠠᠰᠢ ᠤᠯᠠᠨ ᠬᠤᠲᠡ ᠪᠠᠯᠭᠠᠳ ᠲᠤ ᠮᠤᠩᠭᠤᠯ ᠭᠡᠷ  ᠤᠨ ᠤᠷᠤᠢ ᠲᠠᠢ ᠦᠨᠳᠦᠷ ᠠᠰᠠᠷ ᠲᠠᠬᠲᠦ ᠢᠯᠡᠷᠡᠵᠦ ᠲᠡᠯ᠎ᠡ ᠨᠤᠳᠤᠭ ᠤᠨ ᠦᠩᠭᠡ ᠪᠤᠳᠤᠭ ᠤᠷᠤᠭᠤᠯᠳᠠᠭ ᠪᠡ ᠢᠯᠠᠩᠭᠤᠶ᠎ᠠ ᠵᠤᠭᠠᠴᠠᠯ ᠦᠵᠡᠮᠦᠷᠢ ᠶᠢᠨ ᠭᠠᠵᠠᠷ ᠤᠳ ᠲᠤ ᠪᠢᠲᠡ ᠮᠠᠰᠢ ᠤᠯᠠᠨ ᠸᠠᠭᠠᠷ ᠲᠤᠭᠤᠰᠬᠠᠨ ᠪᠦᠲᠦᠴᠡ ᠲᠠᠢ ᠮᠤᠩᠭᠤᠯ ᠭᠡᠷ ᠤᠳ ᠢ ᠤᠯᠵᠦ ᠬᠠᠷᠠᠳᠠᠭ᠃ ᠡᠨᠡ ᠨᠢ ᠨᠢᠭᠡᠨᠲᠡ ᠬᠦᠭᠵᠢᠵᠦ ᠪᠠᠶᠢᠭ᠎ᠠ ᠬᠦᠷ ᠨᠠᠷᠬᠢᠶᠠᠨᠲᠦ ᠬᠤᠲᠡ ᠭᠠᠵᠠᠷ ᠤᠨ ᠦᠵᠡᠮᠵᠢ ᠪᠤᠯᠤᠭᠰᠡᠨ ᠢᠶᠠᠷ ᠦᠯᠦ ᠪᠠᠷᠠᠮ ᠪᠠᠷᠢᠯᠭ᠎ᠠ ᠶᠢᠨ ᠤᠷᠠᠯᠢᠭ ᠢᠶᠠᠷ ᠦᠨᠳᠦᠰᠦᠲᠡᠨ ᠤ ᠤᠨᠴᠠᠯᠢᠭ  ᠢ ᠬᠠᠷᠠᠭᠤᠯᠬᠤ ᠬᠡᠯᠪᠡᠷᠢ ᠪᠤᠯᠵᠠᠢ᠃ ᠪᠠᠰᠡ ᠨᠠᠯᠢᠶᠠᠳ ᠤᠯᠠᠨ ᠠᠯᠪᠠᠨ ᠠᠰᠠᠷ ᠤᠨ ᠤᠷᠤᠢ ᠶᠢ ᠮᠤᠩᠭᠤᠯ ᠭᠡᠷ ᠤᠨ ᠬᠡᠯᠪᠡᠷᠢᠲᠠᠢ ᠴᠢᠮᠡᠭᠯᠡᠭᠰᠡᠨ ᠪᠠᠶᠢᠳᠠᠭ᠃      ᠲᠡᠯ᠎ᠡ ᠨᠤᠳᠤᠭ ᠤᠨ ᠮᠤᠩᠭᠤᠯ ᠭᠡᠷ ᠨᠢ ᠶᠠᠭ ᠯᠡ ᠲᠡᠯᠡᠢ ᠲᠠᠩᠬᠢᠰ ᠲᠤ ᠬᠦᠪᠦᠨ ᠪᠦᠬᠦᠢ ᠨᠠᠪᠴᠢ ᠮᠤᠲᠦ᠂ ᠬᠦᠮᠦᠰ ᠲᠤ ᠦᠨᠦᠴᠢᠷᠠᠩᠭᠦᠢ ᠠᠳᠡᠯ᠎ᠡ ᠪᠠᠨ ᠭᠤᠸ᠎ᠠ ᠰᠠᠶᠢᠬᠠᠨ ᠤ ᠲᠦᠷᠦᠭᠲᠡᠯ ᠦᠭᠭᠦᠨ᠎ᠡ᠃ ᠮᠤᠩᠭᠤᠯ ᠭᠡᠷ ᠲᠤ ᠰᠠᠭᠤᠬᠤ ᠳᠤ ᠦᠨᠡᠭᠡᠷ ᠡᠭᠡ ᠪᠠᠶᠢᠭᠠᠯᠢ ᠶᠢᠨ ᠦᠷᠦᠴᠡᠨ ᠳᠤ ᠠᠭᠤᠰᠤᠭᠰᠡᠨ ᠮᠡᠲᠦ ᠰᠠᠨᠠᠬᠳᠠᠳᠠᠭ᠃ ᠮᠤᠩᠭᠤᠯ ᠭᠡᠷ  ᠤᠨ ᠲᠤᠳᠤᠷ᠎ᠡ ᠠᠴᠠ ᠭᠠᠳᠠᠭᠰᠢ ᠪᠠᠷᠠᠯᠠᠪᠡᠯ ᠡᠵᠡᠭᠦᠢ ᠲᠡᠯ᠎ᠡ᠂ ᠠᠭᠤᠯᠠ ᠬᠦᠲᠦᠯ᠂ ᠭᠤᠤᠯ ᠮᠦᠷᠡᠨ ᠬᠠᠷᠠᠭ᠎ᠠ ᠲᠦᠭᠦᠷᠦᠭᠡᠳ ᠲᠤᠮᠳᠠᠲᠦ ᠤᠯᠤᠰ ᠤᠨ ᠬᠦᠮᠦᠨ ᠪᠠᠶᠢᠭᠠᠯᠢ ᠶᠢᠨ ᠨᠢᠭᠡᠳᠤᠯ ᠬᠡᠮᠡᠬᠦ ᠬᠦᠨ ᠤᠬᠠᠭᠠᠨ ᠤ ᠦᠵᠡᠯ ᠰᠠᠨᠠᠭ᠎ᠠ ᠠᠲᠡ ᠬᠠᠮᠤᠭ ᠤᠨ ᠤᠨᠤᠪᠴᠢᠲᠠᠢ ᠲᠠᠶᠢᠯᠪᠦᠷᠢᠯᠡᠯ ᠢᠶᠠᠨ ᠤᠯᠬᠤ ᠪᠤᠯᠤᠨ᠎ᠡ᠃ ᠵᠢᠵᠢᠭᠭᠡᠨ ᠮᠤᠩᠭᠤᠯ ᠭᠡᠷ ᠡᠭᠡ ᠪᠠᠶᠢᠭᠠᠯᠢ ᠶᠢᠨ ᠤᠷᠤᠨ ᠵᠠᠢ ᠳᠤ ᠡᠪ ᠲᠤᠶᠢᠲᠠᠢ ᠠᠭᠤᠰᠤᠯᠴᠠᠵᠦ᠂ ᠠᠲᠡ ᠠᠮᠢᠳᠤᠷᠠᠳᠠᠭ ᠬᠦᠮᠦᠰ ᠤᠨ ᠡᠭᠡ ᠪᠠᠶᠢᠭᠠᠯᠢ  ᠯᠤᠭ᠎ᠠ ᠶᠢᠨ ᠡᠭᠡᠨᠡᠭ ᠲᠤᠳᠤᠨᠤ ᠬᠤᠪᠢ ᠲᠠᠪᠢᠯᠠᠩ ᠢ ᠤᠯᠠᠮ ᠪᠠᠶᠠᠯᠢᠬᠵᠢᠭᠤᠯᠤᠨ᠎ᠡ ᠪᠢᠯᠡ᠃      ᠡᠩ ᠤᠨ ᠪᠠᠶᠢᠲᠡᠯ ᠳᠤ ᠮᠤᠩᠭᠤᠯ ᠭᠡᠷ ᠢᠶᠠᠨ ᠠᠰ ᠡᠮᠦᠨᠡᠰᠢ ᠪᠤᠶᠦ ᠵᠡᠭᠦᠨ ᠡᠮᠦᠨᠡᠰᠢ ᠬᠠᠨᠳᠤᠭᠤᠯᠵᠦ ᠪᠠᠷᠢᠳᠠᠭ᠃ ᠡᠨᠡ ᠨᠢ ᠮᠤᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠲᠤ ᠪᠠᠷᠠᠭᠤᠨ ᠬᠤᠶᠢᠨ᠎ᠡ ᠠᠴᠠ ᠰᠠᠯᠬᠢᠯᠠᠬᠤ ᠪᠤᠶᠦ ᠲᠤᠬᠰᠢᠨ ᠰᠢᠭᠤᠷᠭ᠎ᠠ ᠢᠷᠡᠲᠡᠭ ᠤᠨ ᠬᠢ ᠶᠤᠮ᠃ ᠮᠤᠩᠭᠤᠯ ᠭᠡᠷ ᠲᠤ ᠰᠠᠭᠤᠳᠠᠭ ᠬᠦᠮᠦᠰ ᠡᠭᠦᠲᠡᠨ ᠲᠡᠯ᠎ᠡ ᠪᠠᠨ ᠡᠮᠦᠨ᠎ᠡ ᠵᠦᠭ ᠭᠡᠵᠦ ᠬᠤᠶᠢᠮᠦᠷ ᠲᠡᠯ᠎ᠡ ᠶᠢ ᠬᠤᠶᠢᠲᠦ ᠵᠦᠭ ᠬᠡᠨ᠎ᠡ᠃      ᠮᠤᠩᠭᠤᠯ ᠭᠡᠷ ᠤᠨ ᠭᠠᠳᠠᠨ᠎ᠡ ᠲᠤᠳᠤᠨᠡᠬᠢ ᠬᠡᠷᠡᠭᠯᠡᠭᠦᠨ ᠨᠢ ᠪᠦᠷ ᠲᠤᠬᠳᠠᠮᠠᠯ ᠪᠠᠶᠢᠳᠠᠭ᠃ ᠡᠨᠡ ᠨᠢ ᠮᠤᠩᠭᠤᠯᠴᠤᠳ ᠤᠨ ᠶᠤᠰᠦ ᠰᠤᠷᠳᠠᠬᠤᠨ ᠬᠢᠭᠡᠳ ᠵᠠᠩ ᠦᠢᠯᠡ ᠲᠠᠢ ᠰᠢᠭᠤᠳ ᠬᠤᠯᠪᠤᠬᠳᠠᠨ᠎ᠡ᠃      ᠮᠤᠩᠭᠤᠯ ᠭᠡᠷ ᠲᠤ ᠲᠦᠪ ᠭᠤᠤᠯ ᠢ ︽ᠭᠤᠯᠤᠮᠲᠡ︾ ᠬᠡᠲᠡᠭ᠃ ᠠᠲᠡ ᠭᠠᠯ ᠲᠤᠯᠭ᠎ᠠ ᠪᠠᠶᠢᠳᠠᠭ ᠪᠤᠯᠬᠤᠷ ᠬᠦᠮᠦᠰ ᠪᠠᠰᠡ ᠭᠠᠯ ᠤᠨ ᠪᠤᠷᠬᠠᠨ ᠤ ᠤᠷᠤᠨ ᠪᠠᠶᠢᠷᠢ ᠭᠡᠵᠦ ᠬᠦᠨᠳᠦᠳᠭᠡᠵᠦ ᠦᠵᠡᠲᠡᠭ᠃      ᠲᠤᠯᠭ᠎ᠠ ᠶᠢᠨ ᠠᠰ ᠬᠤᠶᠢᠲᠦ ᠵᠦᠭ ᠪᠤᠶᠦ ᠪᠠᠷᠠᠭᠤᠨ ᠬᠤᠶᠢᠲᠦ ᠵᠦᠭ ᠢ ᠬᠤᠶᠢᠮᠦᠷ ᠬᠡᠲᠡᠭ᠃ ᠬᠤᠶᠢᠮᠦᠷ  ᠲᠠᠭᠠᠨ ᠪᠤᠷᠬᠠᠨ ᠬᠦᠩᠭᠠᠷᠡᠪᠡ ᠲᠠᠯᠪᠢᠵᠦ᠂ ᠴᠢᠩᠬᠢᠰ ᠬᠠᠭᠠᠨ ᠤ ᠬᠦᠷᠦᠭ ᠢ ᠡᠯᠭᠦᠨ ᠪᠠᠰᠡ ᠬᠠᠵᠠᠭᠤ ᠪᠠᠷ ᠨᠢ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠤ ᠰᠡᠭᠦᠲᠡᠷ ᠤᠳ ᠠᠴᠠ ᠡᠯᠭᠦᠵᠦ ᠴᠢᠮᠡᠲᠡᠭ᠃ ᠡᠭᠦᠲᠡ᠂ ᠭᠠᠯ ᠭᠤᠯᠤᠮᠲᠡ᠂ ᠬᠦᠩᠭᠠᠷᠠᠪᠡ ᠪᠠᠷ ᠭᠤᠤᠯ ᠱᠤᠭᠤᠮ ᠪᠤᠯᠭᠠᠭᠰᠡᠨ ᠬᠤᠶᠢᠮᠦᠷ ᠤᠨ ᠪᠠᠷᠠᠭᠤᠨ ᠭᠠᠷ ᠲᠡᠯ᠎ᠡ ᠶᠢ ᠡᠷᠡᠭᠲᠠᠢ ᠶᠢᠨ ᠰᠠᠭᠤᠳᠡᠯ᠂ ᠵᠠᠭᠦᠨ ᠭᠠᠷ ᠲᠡᠯ᠎ᠡ ᠶᠢ ᠡᠮᠡᠭᠲᠠᠢ ᠶᠢᠨ ᠰᠠᠭᠤᠳᠡᠯ ᠭᠡᠵᠦ ᠬᠤᠶᠢᠮᠦᠷ ᠤᠨ ᠪᠠᠷᠠᠭᠤᠨ ᠲᠡᠯ᠎ᠡ ᠪᠠᠷ ᠬᠦᠨᠲᠦᠲᠦ ᠬᠡᠶᠢᠴᠢᠨ ᠵᠤᠴᠢᠨ ᠢᠶᠠᠨ ᠰᠠᠭᠤᠯᠭᠠᠳᠠᠭ᠃ ᠡᠷᠦᠭᠡ ᠶᠢᠨ ᠪᠠᠷᠠᠭᠤᠨ ᠬᠠᠶᠠᠭ᠎ᠠ ᠪᠠᠷ ᠡᠮᠡᠭᠡᠯ ᠲᠤᠨᠤᠭ ᠲᠠᠯᠪᠢᠵᠦ᠂ ᠨᠤᠮᠤ ᠰᠠᠭᠠᠳᠠᠭ ᠠᠪᠡ ᠶᠢᠨ ᠫᠤᠤ ᠵᠡᠷᠭᠡ ᠶᠢ ᠬᠠᠨᠠᠨ ᠠᠴᠠ ᠡᠯᠭᠦᠲᠡᠭ᠃ ᠵᠠᠭᠦᠨ ᠲᠡᠯ᠎ᠡ ᠪᠠᠷ ᠠᠶᠠᠭ᠎ᠠ ᠱᠦᠭᠦᠢ᠂ ᠲᠤᠭᠤᠭ᠎ᠠ ᠰᠢᠨᠠᠭ᠎ᠠ ᠵᠢᠴᠢ ᠪᠦᠰᠡᠭᠦᠶᠢᠴᠤᠤᠯ ᠤᠨ ᠡᠳ᠋ᠯᠡᠯ ᠬᠡᠷᠡᠭᠯᠡᠭᠦᠨ ᠢ ᠲᠠᠯᠪᠢᠲᠠᠭ᠃ ᠪᠤᠰᠤᠳ ᠡᠳ᠋ᠯᠡᠯ ᠨᠢ ᠴᠦ ᠲᠤᠬᠳᠠᠭᠰᠡᠨ ᠤᠷᠤᠨ ᠪᠠᠶᠢᠷᠢ  ᠲᠠᠢ ᠪᠠᠶᠢᠳᠠᠭ᠃      ᠮᠤᠩᠭᠤᠯ ᠭᠡᠷ ᠤᠨ ᠭᠠᠳᠠᠨ᠎ᠡ ᠴᠦ ᠲᠤᠷ᠎ᠡ ᠪᠠᠷ ᠤᠨᠳᠤᠢ ᠰᠤᠨᠳᠤᠢ ᠶᠠᠭᠤᠮ᠎ᠡ ᠲᠠᠯᠪᠢᠳᠠᠭ ᠦᠭᠡᠢ᠃ ᠬᠠᠰᠠᠭ ᠲᠡᠷᠭᠡ ᠶᠢ ᠪᠠᠷᠠᠭᠤᠨ ᠬᠠᠶᠠᠭ᠎ᠠ ᠪᠠᠷ ᠲᠠᠯᠪᠢᠨ ᠠᠷᠭᠠᠯ ᠤᠨ ᠲᠡᠷᠭᠡ ᠶᠢ ᠪᠠᠷᠠᠭᠤᠨ ᠡᠮᠦᠨ᠎ᠡ᠂ ᠤᠰᠤᠨ ᠤ ᠲᠡᠷᠭᠡ ᠶᠢ ᠵᠠᠭᠦᠨ ᠡᠮᠦᠨᠡᠭᠦᠷ ᠲᠠᠯᠪᠢᠵᠦ᠂ ᠦᠨᠡᠰᠦ ᠪᠠᠨ ᠵᠡᠭᠦᠨ ᠡᠮᠦᠨ᠎ᠡ ᠵᠦᠭ ᠲᠤ ᠭᠡᠷ ᠠᠴᠠ ᠨᠠᠯᠢᠶᠠᠳ ᠵᠠᠶᠢᠳᠠᠢ ᠭᠠᠵᠠᠷ ᠠᠰᠬᠠᠵᠦ᠂ ᠬᠤᠨᠢᠨ ᠤ ᠬᠤᠷᠤᠭ᠎ᠠ ᠪᠠᠨ ᠵᠡᠭᠦᠨ ᠬᠠᠶᠠᠭᠠᠨ ᠳᠤ ᠪᠠᠷᠢᠳᠠᠭ᠃      ᠮᠤᠩᠭᠤᠯ ᠭᠡᠷ ᠲᠤ ᠵᠤᠴᠢᠨ ᠪᠤᠯᠵᠦ ᠤᠴᠢᠬᠤ ᠳᠤ ᠪᠠᠰᠡ ᠮᠠᠰᠢ ᠤᠯᠠᠨ ᠲᠦᠷᠢᠮ ᠭᠤᠷᠢᠮ ᠪᠠᠶᠢᠳᠠᠭ᠃ ᠲᠦᠭᠦᠮ ᠭᠡᠳᠤᠨ ᠵᠤᠷᠪᠤᠰ ᠲᠠᠨᠢᠯᠴᠠᠭᠤᠯᠪᠡᠯ᠄ ᠨᠢᠭᠡ᠂ ᠠᠶᠢᠯ ᠤᠨ ᠬᠠᠶᠠᠭ᠎ᠠ ᠲᠦᠭᠦᠪᠡᠯ ᠮᠤᠷᠢᠨ ᠤ ᠪᠠᠨ ᠵᠢᠯᠤᠭᠤ ᠶᠢ ᠲᠠᠳᠠᠵᠦ ᠠᠯᠭᠤᠷ ᠶᠠᠪᠤᠬᠤ ᠬᠡᠷᠡᠭᠲᠠᠢ᠃ ᠭᠡᠷ ᠤᠨ ᠡᠮᠦᠨᠡᠭᠦᠷ ᠰᠢᠭᠤᠳ ᠲᠤᠪᠳᠤᠯᠭᠠᠨ ᠭᠠᠷᠴᠦ ᠪᠤᠯᠬᠤ ᠦᠭᠡᠢ᠃ ᠬᠤᠶᠠᠷ᠂ ᠵᠤᠴᠢᠨ ᠤᠬᠳᠤᠭᠰᠠᠳ ᠨᠢ ᠠᠬᠠᠮᠠᠳ ᠬᠦᠮᠦᠨ ᠪᠠᠶᠢᠪᠡᠯ ᠤᠷᠢᠳ ᠢᠶᠠᠷ ᠤᠨᠤᠭᠠᠨ ᠠᠴᠠ ᠪᠠᠨ ᠪᠠᠭᠤᠵᠦ ᠤᠬᠳᠤᠨ ᠤᠴᠢᠨ᠎ᠡ᠃ ᠭᠤᠷᠪᠡ᠂ ᠢᠷᠡᠭᠰᠡᠨ ᠵᠤᠴᠢᠨ ᠠᠬᠠᠮᠠᠳ ᠨᠠᠰᠤᠲᠡᠨ ᠪᠤᠯ ᠬᠡᠦᠭᠡᠳ ᠵᠠᠯᠠᠭᠤᠴᠤᠳ ᠲᠤᠰᠴᠦ ᠤᠴᠢᠨ ᠵᠦᠪ ᠲᠡᠯ᠎ᠡ ᠶᠢᠨ ᠲᠤᠬᠤᠢ ᠶᠢ ᠨᠢ ᠡᠷᠭᠦᠨ ᠬᠦᠨᠲᠦᠯᠡᠨ᠎ᠡ᠃ ᠲᠦᠷᠪᠡ᠂ ᠢᠷᠡᠭᠰᠡᠨ ᠵᠤᠴᠢᠨ ᠲᠠᠰᠢᠭᠤᠷ᠂ ᠤᠷᠭ᠎ᠠ᠂ ᠵᠡᠯ᠎ᠡ ᠲᠡᠭᠡᠭᠦᠷ ᠠᠯᠬᠤᠵᠦ ᠪᠤᠯᠬᠤ ᠦᠭᠡᠢ᠃ ᠲᠠᠪᠤ᠂ ᠵᠤᠴᠢᠨ ᠭᠡᠷ ᠲᠤ ᠤᠷᠤᠬᠤ ᠳᠠᠭᠠᠨ ᠲᠠᠰᠢᠭᠤᠷ᠂ ᠴᠢᠳᠤᠷ᠂ ᠵᠡᠷ ᠵᠡᠪᠰᠡᠭ ᠠᠪᠴᠦ ᠤᠷᠤᠵᠦ ᠪᠤᠯᠳᠠᠭ ᠦᠭᠡᠢ᠃ ᠵᠢᠷᠭᠤᠭ᠎ᠠ᠂ ᠵᠤᠴᠢᠨ ᠡᠷᠬᠡᠪᠰᠢ ᠮᠠᠯᠠᠭᠠᠢ ᠪᠠᠨ ᠲᠡᠭᠰᠢ ᠡᠮᠦᠰᠴᠦ᠂ ᠲᠤᠪᠴᠢ ᠰᠢᠯᠪᠢ ᠪᠠᠨ ᠲᠤᠪᠴᠢᠯᠠᠵᠦ᠂ ᠪᠦᠰᠡ ᠪᠠᠨ ᠴᠢᠩᠭ᠎ᠠ ᠪᠦᠰᠡᠯᠡᠭᠰᠡᠨ ᠪᠠᠶᠢᠬᠤ ᠬᠡᠷᠡᠭᠲᠠᠢ᠃ ᠲᠤᠯᠤᠭ᠎ᠠ᠂ ᠬᠤᠷᠮᠤᠢ  ᠪᠠᠨ ᠪᠠᠭᠤᠯᠭᠠᠵᠦ᠂ ᠬᠢᠲᠡ ᠬᠢᠳᠤᠭ᠎ᠠ ᠪᠠᠨ ᠰᠠᠭᠠᠯᠳᠤᠷᠭᠠᠯᠠᠵᠦ᠂ ᠬᠠᠨᠴᠤᠢ ᠪᠠᠨ ᠪᠠᠭᠤᠯᠭᠠᠭᠰᠡᠨ ᠪᠠᠶᠢᠬᠤ ᠬᠡᠷᠡᠭᠲᠠᠢ᠃ ᠨᠠᠢᠮᠠ᠂ ᠮᠤᠩᠭᠤᠯ ᠭᠡᠷ ᠢ ᠰᠠᠶᠢᠳᠤᠷ ᠠᠵᠢᠬᠯᠠᠵᠦ ᠦᠵᠡᠨ᠎ᠡ᠃ ᠭᠡᠷ ᠤᠨ ᠪᠠᠷᠠᠭᠤᠨ᠎ᠡ ᠵᠢᠵᠢᠭ ᠨᠤᠮᠤ ᠡᠯᠭᠦᠭᠡᠰᠤᠲᠠᠢ ᠪᠤᠯ ᠬᠦᠪᠡᠭᠡᠨ ᠲᠦᠷᠦᠭᠰᠡᠨ ᠰᠡᠷ᠎ᠡ ᠲᠠᠢ ᠭᠡᠷ᠂ ᠵᠡᠭᠦᠨ ᠲᠡᠯ᠎ᠡ ᠪᠠᠷ ᠨᠢᠭᠡᠨ ᠪᠠᠭᠴᠡ ᠴᠡᠴᠡᠭ ᠪᠠᠶᠢᠪᠡᠯ ᠦᠬᠢᠨ ᠲᠦᠷᠦᠭᠰᠡᠨ ᠰᠡᠷ᠎ᠡ ᠶᠢᠨ ᠭᠡᠷ ᠪᠤᠯᠤᠨ᠎ᠡ᠃ ᠲᠤᠭᠤᠨᠤ ᠨᠢ ᠪᠢᠲᠡᠭᠦᠦ ᠪᠠᠶᠢᠪᠡᠯ ᠪᠡᠶ᠎ᠡ ᠦᠩᠭᠡᠷᠡᠭᠰᠡᠨ ᠵᠡᠷᠭᠡ ᠴᠡᠭᠡᠷ ᠤᠨ ᠲᠡᠮᠲᠡᠭ ᠪᠠᠶᠢᠳᠠᠭ᠃ ᠶᠠᠭᠠᠬᠢᠬᠰᠡᠨ ᠴᠦ ᠤᠷᠤᠵᠦ ᠦᠯᠦ ᠪᠤᠯᠤᠨ᠎ᠡ᠃ ᠶᠢᠰᠦ᠂ ᠭᠡᠷ ᠲᠤ ᠤᠷᠤᠬᠤ ᠳᠤ ᠤᠷᠢᠳ ᠢᠶᠠᠷ ᠪᠠᠷᠠᠭᠤᠨ ᠬᠦᠯ ᠢᠶᠠᠷ ᠪᠤᠱᠤᠭ᠎ᠠ ᠶᠢ ᠨᠢ ᠠᠯᠬᠤᠨ᠎ᠡ᠃ ᠠᠷᠪᠡ᠂ ᠮᠤᠷᠢᠨ ᠤ ᠱᠤᠩ ᠤᠨ ᠬᠠᠵᠠᠭᠤ ᠳᠤ ᠰᠢᠭᠡᠵᠦ ᠪᠤᠯᠳᠠᠭ ᠦᠭᠡᠢ᠃ ᠠᠷᠪᠠᠨ ᠨᠢᠭᠡ᠂ ᠵᠤᠴᠢᠳ ᠤᠨ ᠪᠠᠭᠤᠳᠡᠯ ᠤᠨ ᠬᠤᠪᠢ ᠳᠤ ᠭᠡᠷ ᠤᠨ ᠪᠠᠷᠠᠭᠤᠨ ᠲᠡᠯ᠎ᠡ ᠪᠡ ᠪᠦᠰᠡᠳᠠᠶᠢᠴᠤᠤᠯ ᠢ ᠰᠠᠭᠤᠯᠭᠠᠵᠦ᠂ ᠪᠦᠰᠡᠬᠦᠶᠢᠴᠤᠤᠯ ᠢ ᠵᠠᠭᠦᠨ ᠲᠡᠯ᠎ᠡ ᠪᠠᠷ᠂ ᠠᠬᠠᠮᠠᠳ ᠬᠦᠮᠦᠨ ᠢ ᠬᠤᠶᠢᠮᠦᠷ ᠬᠠᠪᠢᠳᠠᠭᠤ᠂ ᠵᠠᠯᠠᠭᠤ ᠪᠠᠭᠠᠴᠤᠳ ᠢ ᠡᠮᠦᠨ᠎ᠡ ᠲᠡᠯ᠎ᠡ ᠪᠠᠷ ᠰᠠᠭᠤᠯᠭᠠᠨ᠎ᠡ᠃ ᠠᠷᠪᠠᠨ ᠬᠤᠶᠠᠷ᠂ ᠴᠠᠢ ᠠᠶᠠᠭᠠᠯᠠᠬᠤ ᠳᠠᠭᠠᠨ ᠮᠡᠯᠮᠡᠯᠵᠠᠳᠡᠯ᠎ᠡ ᠲᠦᠭᠦᠷᠭᠡᠲᠡᠭ ᠦᠭᠡᠢ ᠪᠦᠭᠡᠳ ᠭᠡᠲᠦ ᠲᠤᠨᠳᠠᠭᠤᠷ ᠴᠦ ᠠᠶᠠᠭᠠᠯᠠᠳᠠᠭ ᠦᠭᠡᠢ᠃ ᠵᠤᠴᠢᠳ ᠠᠶᠠᠭᠠᠯᠠᠭᠰᠡᠨ ᠴᠠᠢ ᠶᠢ ᠪᠠᠷᠠᠭᠤᠨ ᠭᠠᠷ ᠢᠶᠠᠷ ᠢᠶᠠᠨ ᠲᠤᠰᠴᠦ ᠠᠪᠬᠤ ᠨᠢ ᠭᠡᠷ ᠤᠨ ᠡᠵᠡᠨ ᠢ ᠬᠦᠨᠲᠦᠯᠡᠵᠦ ᠪᠠᠶᠢᠭ᠎ᠠ ᠶᠢ ᠢᠯᠡᠳᠭᠡᠲᠡᠭ᠃ ᠶᠡᠷᠦ  ᠨᠢ ᠡᠨᠡ ᠮᠡᠲᠦ ᠤᠯᠠᠨ ᠶᠤᠰᠦ ᠰᠤᠷᠲᠡᠯ ᠢ ᠮᠡᠲᠡᠵᠦ ᠠᠪᠤᠯᠲᠠᠢ᠃                                      ︽ᠮᠤᠩᠭᠤᠯ ᠰᠤᠶᠤᠯ ᠤᠨ ᠲᠠᠶᠢᠯᠦᠮᠵᠢ︾ ᠨᠤᠮ ᠠᠴᠠ ᠨᠠᠶᠢᠷᠠᠭᠤᠯᠤᠨ ᠪᠠᠭᠤᠯᠭᠠᠪᠡ
 
ᠢᠷᠡᠯᠲᠡ᠄ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠶᠢᠰᠦ ᠡᠬᠢᠯᠡᠯ᠎ᠡ
ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠤ ᠮᠤᠩᠭᠤᠯᠴᠤᠳ ᠤᠨ ᠬᠡᠪ ᠶᠤᠰᠤᠨ — ᠴᠠᠭᠠᠨ ᠰᠡᠷ᠎ᠡ ᠰᠢᠨᠡᠯᠡᠬᠦ ᠶᠤᠰᠤᠨ
ᠰᠦᠯᠲᠡ ᠶᠢᠨ ᠲᠠᠬᠢᠯᠭ᠎ᠠ
ᠶᠢᠰᠦ ᠶᠢᠰᠦ ᠶᠢᠨ ᠪᠡᠯᠡᠭ
ᠪᠦᠬᠦᠯᠢ ᠬᠤᠨᠢᠨ ᠰᠢᠭᠦᠰᠦ ᠶᠢᠨ ᠢᠷᠦᠭᠡᠯ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号