ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠪᠢᠲᠡ ᠪᠦᠬᠦᠨ ᠤ ᠬᠥᠮᠦᠵᠢᠯ — ᠮᠤᠩᠭᠤᠯ ᠰᠤᠶᠤᠯ ᠢᠶᠠᠷ ᠢᠶᠠᠨ ᠬᠥᠮᠦᠨ ᠪᠤᠯᠬᠤ ᠶᠢᠨ ᠤᠴᠢᠷ ᠲᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-06-20
     ᠰᠠᠶᠢᠨ ᠰᠠᠨᠠᠭᠠᠨ ᠤ ᠦᠵᠦᠬᠦᠷ ᠰᠦ ᠪᠠᠶᠢᠳᠠᠭ ᠤᠨ ᠣᠴᠢᠷ      ᠮᠣᠩᠭᠤᠯ ᠠᠷᠠᠳ ᠤᠨ ᠳᠣᠮᠤᠭ ᠦᠯᠢᠬᠡᠷ ᠪᠣᠶᠣ ᠪᠠᠭᠠᠳᠣᠷᠯᠢᠭ ᠳᠣ‍ᠣᠯᠢ ᠳᠤ ᠶᠠᠮᠠᠷ ᠨᠢᠬᠡᠨ ᠦᠴᠦᠬᠡᠨ ᠶᠠᠪᠣᠳᠠᠯ ᠳᠤ ᠳᠣᠰᠠ ᠪᠣᠯᠣᠭᠰᠠᠨ ᠤ ᠠᠴᠢ ᠪᠠᠷ ᠳᠠᠶᠢᠨ ᠪᠠᠶᠢᠯᠳᠣᠭᠠᠨ ᠤ ᠳᠣᠮᠳᠠ ᠬᠦᠴᠢᠷ ᠳᠦᠪᠡᠭ ᠣᠴᠠᠷᠠᠬᠤ ᠦᠶ᠎ᠡ ᠳᠤ ᠳᠣᠰᠠᠯᠠᠬᠤ ᠬᠦᠮᠦᠨ ᠭᠠᠷᠣᠭᠠᠳ ᠢᠷᠡᠳᠡᠭ ᠶᠠᠪᠣᠳᠠᠯ ᠣᠯᠠᠨᠳᠠ ᠳᠠᠪᠳᠠᠭᠳᠠᠨ ᠶᠠᠷᠢᠭᠳᠠᠵᠣ ᠪᠠᠶᠢᠳᠠᠭ᠃ ᠡᠬᠦᠪᠡᠷ ᠳᠠᠮᠵᠢᠭᠤᠯᠵᠣ ᠮᠤᠩᠭᠤᠯᠴᠤᠳ ︽ᠰᠠᠶᠢᠨ ᠰᠠᠨᠠᠭᠠᠨ ᠤ ᠦᠵᠦᠬᠦᠷ ᠰᠦ᠂ ᠮᠠᠭᠤ ᠰᠠᠨᠠᠭᠠᠨ ᠤ ᠦᠵᠦᠬᠦᠷ ᠬᠦ᠋︾ ᠭᠡᠳᠡᠭ ᠶᠣᠰᠣ ᠣᠴᠢᠷ ᠢ ᠬᠡᠦᠬᠡᠳ ᠠᠴᠢᠨᠠᠷ ᠲᠠᠭᠠᠨ ᠦᠶ᠎ᠡ ᠳᠠᠮᠵᠢᠨ ᠰᠣᠷᠳᠠᠯᠴᠢᠯᠠᠵᠣ ᠪᠠᠶᠢᠭᠰᠠᠨ ᠪᠠᠶᠢᠨ᠎ᠠ᠃ ᠳᠡᠭᠡᠭᠡᠳ ︽ᠳᠣᠰᠠ ᠲᠠᠢ ᠰᠠᠶᠢᠨ ᠶᠠᠪᠣᠳᠠᠯ ᠢ ᠨᠠᠰᠣᠳᠠ ᠬᠢᠴᠢᠶᠡ᠂ ᠳᠣᠰᠠ ᠲᠠᠢ ᠰᠠᠶᠢᠨ ᠬᠦᠮᠦᠨ ᠣᠰᠣ ᠮᠡᠳᠦ ᠡᠶᠡᠯᠳᠡᠭ᠂ ᠳᠣᠩ ᠮᠠᠭᠤ ᠬᠦᠮᠦᠨ ᠮᠣᠳᠣ ᠮᠡᠳᠦ ᠬᠦᠰᠢᠬᠦᠨ︾ ᠭᠡᠵᠦ ᠰᠣᠷᠭᠠᠮᠵᠢᠯᠠᠨ ᠵᠠᠬᠢᠵᠣ ᠪᠠᠶᠢᠭᠰᠠᠨ ᠶᠣᠮ᠃ ᠡᠬᠦᠨ ᠲᠠᠢ ᠡᠰᠡᠷᠬᠦ ᠪᠠᠷ ︽ᠰᠠᠶᠢᠨ ᠰᠠᠨᠠᠭ᠎ᠠ ᠳᠠᠯ᠎ᠠ ᠶᠢ ᠳᠣᠭᠤᠷᠢᠨ᠎ᠠ ᠮᠠᠭᠤ ᠰᠠᠨᠠᠭ᠎ᠠ ᠪᠡᠶ᠎ᠡ ᠶᠢ ᠳᠣᠭᠤᠷᠢᠨ᠎ᠠ︾ ᠭᠡᠵᠦ ᠮᠠᠭᠤ ᠰᠠᠨᠠᠭ᠎ᠠ ᠭᠠᠵᠢᠭᠤ ᠪᠣᠳᠣᠯ ᠲᠠᠢ ᠶᠠᠪᠣᠬᠤ ᠶᠢ ᠰᠣᠷᠭᠠᠨ ᠴᠡᠭᠡᠷᠯᠡᠬᠦᠯᠵᠦ ᠪᠠᠶᠢᠭᠰᠠᠨ ᠶᠣᠮ᠃ ︽ᠰᠠᠨᠠᠭ᠎ᠠ ᠮᠠᠭᠤᠳᠣ ᠶᠠᠪᠣᠨ ᠭᠤᠳᠣᠨ᠎ᠠ᠂ ᠰᠠᠷᠢᠰᠦᠨ ᠪᠠᠭᠪᠠᠭᠠᠢ ᠨᠠᠷᠠᠨ ᠳᠤ ᠬᠠᠳᠠᠨ᠎ᠠ︾᠂ ︽ᠰᠠᠨᠠᠭᠠᠨ ᠤ ᠮᠠᠭᠤ ᠪᠠᠷ ᠵᠠᠶᠠᠭ᠎ᠠ ᠪᠠᠨ ᠪᠠᠷᠠᠨ᠎ᠠ᠂ ᠰᠠᠪᠠᠨ ᠤ ᠮᠠᠭᠤ ᠪᠠᠷ ᠪᠣᠳᠠᠭ᠎ᠠ ᠪᠠᠨ ᠪᠠᠷᠠᠨ᠎ᠠ︾ ᠭᠡᠬᠦ ᠮᠡᠳᠦ᠂ ᠳᠡᠭᠡᠪᠡᠯ ᠮᠣᠩᠭᠤᠯᠴᠣᠳ ᠤᠨ ᠬᠡᠦᠬᠡᠳ ᠲᠡᠭᠡᠨ ᠵᠠᠬᠢᠵᠦ ᠡᠷᠬᠢᠮᠯᠡᠳᠡᠭ ᠰᠠᠶᠢᠨ ᠰᠠᠨᠠᠭ᠎ᠠ ᠭᠡᠳᠡᠭ ᠨᠢ ᠶᠠᠮᠠᠷ ᠪᠣᠢ ᠭᠡᠪᠡᠯ᠂ ᠡᠩ ᠳᠡᠷᠢᠬᠦᠨ ᠳᠤ ︽ᠵᠣᠪᠠᠯᠠᠩᠳᠠᠨ ᠢ ᠡᠨᠡᠷᠢᠬᠦ︾ ᠳᠤ ᠢᠯᠡᠷᠡᠵᠦ ᠪᠠᠶᠢᠳᠠᠭ᠃ ᠶᠢᠷᠳᠢᠨᠴᠦ ᠶᠢᠨ ᠬᠦᠮᠦᠨ ᠳᠤ ︽ᠡᠪᠡᠳᠬᠦ ᠶᠢᠨ ᠵᠣᠪᠠᠯᠠᠩ᠂ ᠦᠳᠡᠯᠬᠦ ᠶᠢᠨ ᠵᠣᠪᠠᠯᠠᠩ᠂ ᠦᠬᠡᠶᠢᠷᠡᠬᠦ ᠶᠢᠨ ᠵᠣᠪᠠᠯᠠᠩ︾ ᠪᠣᠢ ᠭᠡᠵᠦ ᠦᠵᠡᠳᠡᠭ᠂ ᠡᠪᠡᠳᠴᠢᠨ ᠡᠮᠬᠡᠭ ᠣᠯᠣᠭᠰᠠᠨ ᠬᠦᠮᠦᠨ ᠳᠤ ᠳᠣᠰᠠ ᠳᠡᠮ ᠪᠣᠯᠵᠣ ᠡᠷᠡᠬᠦᠯ ᠰᠠᠷᠠᠭᠤᠯ ᠪᠣᠯᠬᠤ ᠳᠤᠨᠢ ᠳᠣᠰᠠᠯᠠᠬᠤ ᠶᠢ ︽ᠠᠷᠪᠠᠨ ᠴᠠᠭᠠᠨ ᠪᠣᠶᠠᠨ ᠤ ᠨᠢᠬᠡ︾ ᠭᠡᠵᠦ ᠦᠵᠡᠳᠡᠭ ᠶᠣᠮ᠃ ︽ᠳᠠᠪᠣᠨ ᠳᠠᠷᠢᠶ᠎ᠠ ᠢᠳᠡᠭᠰᠡᠨ ᠬᠦᠮᠦᠨ ᠡᠪᠡᠳᠴᠢᠨ ᠢ ᠬᠡᠨ ᠡᠰᠡ ᠣᠯᠣᠨ᠎ᠠ︾ ᠭᠡᠵᠦ ᠡᠪᠡᠳᠴᠢᠯᠡᠭᠰᠡᠳ ᠢ ᠪᠣᠯᠭᠤᠭᠠᠨ ᠦᠵᠡᠵᠦ ᠰᠡᠳᠬᠢᠯ ᠤᠨ ᠳᠠᠶᠢᠳᠬᠤᠷᠠᠭᠤᠯᠣᠯ ᠣᠯᠭᠤᠬᠤ᠂ ᠡᠳ᠋ ᠮᠦᠩᠬᠦ ᠪᠠᠷ ᠳᠣᠰᠠᠯᠠᠬᠤ ᠵᠡᠷᠭᠡᠪᠠᠷ ᠳᠡᠮ ᠳᠣᠰᠠ ᠦᠭᠳᠡᠭ ᠶᠣᠮ᠃ ᠦᠳᠡᠯᠵᠦ ᠬᠦᠭᠰᠢᠷᠡᠭᠰᠡᠳ ᠬᠦᠯ ᠭᠠᠷ ᠪᠢᠳᠠᠭᠤ ᠪᠣᠯᠵᠣ ᠦᠬᠦᠯᠡᠵᠦ ᠶᠠᠷᠢᠬᠤ ᠠᠴᠠ ᠡᠬᠢᠯᠡᠨ ᠰᠠᠭᠤᠵᠣ ᠪᠠᠷᠢᠬᠤ ᠳᠦᠬᠦᠮ ᠦᠬᠡᠢ ᠪᠣᠯᠬᠤ ᠦᠶᠡᠰ ᠳᠦᠰᠢᠵᠦ ᠳᠣᠯᠵᠣ ᠳᠡᠮ ᠳᠣᠰᠠ ᠪᠣᠯᠵᠣ ᠪᠠᠶᠢᠳᠠᠭ᠃ ᠶᠠᠳᠠᠭᠤ ᠵᠦᠳᠡᠬᠦᠦ ᠠᠮᠢᠳᠣᠷᠠᠭᠰᠠᠳ ᠪᠠ ᠵᠦᠳᠡᠵᠦ ᠪᠠᠶᠢᠭ᠎ᠠ ᠬᠦᠮᠦᠰ ᠲᠤ ᠬᠤᠭᠤᠯᠨ ᠣᠮᠳᠠ ᠬᠠᠩᠭᠠᠬᠤ ᠠᠴᠠ ᠪᠣᠴᠠᠳᠠᠭ ᠦᠬᠡᠢ᠂ ᠣᠶᠢᠷᠠᠬᠠᠨ ᠪᠣᠯᠳᠠᠯ᠎ᠠ ᠠᠶᠠᠨ ᠵᠠᠮ ᠤᠨ ᠬᠦᠮᠦᠨ ︽ᠬᠤᠨᠤᠭ ᠭᠤᠶᠣᠬᠤ︾ ᠳᠤ ᠪᠣᠯᠬᠤ ᠦᠬᠡᠢ ᠭᠡᠵᠦ ᠶᠠᠷᠰᠢᠭᠯᠠᠳᠠᠭ ᠠᠶᠢᠯ ᠬᠤᠪᠣᠷ ᠶᠣᠮ᠃ ᠭᠡᠷ ᠢᠶᠠᠨ ᠡᠬᠦᠷᠴᠦ ᠶᠠᠪᠣᠭᠰᠠᠨ ᠬᠦᠮᠦᠨ ᠪᠠᠶᠢᠨ᠎ᠠ ᠤᠤ ᠭᠡᠳ ᠠᠯᠢ ᠪᠠᠶᠢᠭᠰᠠᠨ ᠢᠶᠠᠨ ᠳᠡᠮᠳᠡᠷᠢᠵᠦ ᠠᠮᠳᠠ ᠰᠢᠮᠳᠡ ᠲᠠᠢ ᠬᠤᠭᠤᠯᠨ ᠪᠣᠳᠠᠭ᠎ᠠ ᠪᠠᠷ ᠵᠣᠴᠢᠯᠠᠵᠣ ᠮᠣᠷᠳᠠᠭᠤᠯᠳᠠᠭ ᠶᠣᠮ᠃      ︽ᠵᠠᠮ ᠳᠡᠭᠡᠷ᠎ᠡ ᠠᠭᠤᠯᠵᠠᠭᠰᠠᠨ ᠬᠦᠮᠦᠨ ᠵᠢᠷᠨ ᠬᠤᠨᠤᠭ ᠤᠨ ᠢᠷᠦᠬᠡᠯ ᠲᠠᠢ︾ ᠭᠡᠳᠡᠭ᠃ ᠨᠡᠩ ᠦᠬᠡᠶᠢᠬᠦᠦ ᠶᠠᠳᠠᠭᠤ ᠬᠦᠮᠦᠨ ᠳᠤ ᠪᠠᠭ᠎ᠠ ᠴᠦ ᠭᠡᠰᠡᠨ ᠳᠣᠰᠠᠯᠠᠮᠵᠢ ᠪᠣᠯᠵᠣ ᠪᠠᠶᠢᠬᠤ ᠶᠢ ᠬᠢᠴᠢᠶᠡᠵᠦ ︽ᠳᠣᠰᠣᠯ ᠢ ᠬᠤᠷᠢᠶᠠᠪᠠᠯ ᠳᠠᠯᠠᠢ ᠪᠣᠯᠣᠨ᠎ᠠ᠂ ᠳᠣᠭᠤᠯᠣᠭᠰᠠᠨ ᠢ ᠬᠤᠷᠢᠶᠠᠪᠠᠯ ᠡᠷᠳᠡᠮ ᠪᠣᠯᠣᠨ᠎ᠠ︾ ᠭᠡᠳᠡᠭ᠃ ︽ᠳᠡᠩᠬᠡᠷᠡᠵᠦ ᠪᠠᠶᠢᠬᠤ ᠦᠶ᠎ᠡ ᠳᠤ ᠳᠡᠮᠡᠭᠡ ᠪᠠᠷ ᠳᠣᠰᠠᠯᠠᠬᠤ ᠪᠠᠷ ᠳᠡᠪᠳᠡᠵᠦ ᠪᠠᠶᠢᠬᠤ ᠦᠶ᠎ᠡ ᠳᠤ ᠳᠡᠪᠡᠨᠡ ᠪᠠᠷ ᠳᠣᠰᠠᠯᠠ︾ ᠭᠡᠰᠡᠨ ᠮᠡᠷᠭᠡᠨ ᠦᠬᠡ ᠪᠠᠶᠢᠳᠠᠭ ᠶᠣᠮ᠃ ︽ᠡᠪᠡᠳᠴᠦ ᠵᠣᠪᠠᠭᠰᠠᠨ ᠢ ᠡᠨᠡᠷᠢᠪᠡᠯ ᠨᠢᠬᠡ ᠪᠣᠶᠠᠨ᠂ ᠦᠨᠦᠴᠢᠨ ᠪᠡᠯᠪᠡᠰᠦᠨ ᠢ ᠳᠡᠳᠬᠦᠪᠡᠯ ᠨᠢᠬᠡ ᠪᠣᠶᠠᠨ᠂ ᠦᠬᠡᠶᠢᠬᠦᠦ ᠶᠠᠳᠠᠭᠤ ᠶᠢ ᠳᠣᠰᠠᠯᠠᠪᠠᠯ ᠨᠢᠬᠡ ᠪᠣᠶᠠᠨ︾ ᠭᠡᠵᠦ ︽ᠭᠤᠷᠪᠠᠨ ᠪᠣᠶᠠᠨ︾ ᠤ ᠦᠷ᠎ᠡ ᠰᠠᠳᠣ ᠭᠡᠮᠡᠨ ᠮᠣᠩᠭᠤᠯᠴᠣᠳ ᠪᠡᠯᠭᠡᠰᠢᠶᠡᠳᠡᠭ ᠶᠣᠮ᠃ ᠨᠢᠬᠡ ᠨᠢ ᠬᠦᠴᠢᠷᠳᠡᠪᠡᠯ ᠨᠡᠶᠢᠳᠡ ᠪᠠᠷ ᠳᠣᠰᠠᠯᠠᠳᠠᠭ ᠵᠠᠩ ᠵᠢᠷᠣᠮ ᠮᠣᠩᠭᠤᠯᠴᠣᠳ ᠤᠨ ᠳᠣᠮᠳᠠ ᠬᠦᠯᠵᠢᠨ ᠳᠣᠭᠳᠠᠵᠣ ︽ᠳᠣᠷᠣᠨᠠᠰᠢ ᠪᠣᠴᠠᠭᠰᠠᠨ ᠳᠣᠷᠭᠤᠳᠴᠣᠳ︾ ᠤᠨ ᠬᠠᠳᠠᠭᠤ ᠪᠡᠷᠬᠡ ᠣᠷᠳᠣ ᠶᠢᠨ ᠠᠶᠠᠨ ᠢ ᠬᠠᠮᠳᠣ ᠪᠠᠷ ᠳᠣᠭᠤᠯᠵᠣ ᠢᠷᠡᠭᠰᠡᠨ ᠳᠡᠯᠡᠬᠡᠢ ᠳᠤ ᠬᠤᠣᠰ ᠦᠬᠡᠢ ᠨᠣᠳᠤᠭ ᠪᠣᠴᠠᠬᠤ ᠠᠶᠠᠯᠠᠯ ᠨᠢ ᠰᠠᠶᠢᠨ ᠰᠠᠨᠠᠭᠠᠨ ᠤ ᠦᠵᠦᠬᠦᠷ ᠰᠦ ᠪᠠᠶᠢᠳᠠᠭ ᠶᠣᠰᠦ ᠣᠴᠢᠷ ᠢ ᠨᠡᠩ ᠳᠣᠳᠣᠷᠬᠠᠢ ᠭᠡᠷᠡᠴᠢᠯᠡᠭᠰᠡᠨ ᠶᠣᠮ᠃      ᠳᠡᠦᠬᠡᠨ ᠳᠡᠭᠡᠷ᠎ᠡ ᠳᠡᠮᠦᠵᠢᠨ ᠰᠢᠷᠭ᠎ᠠ ᠠᠭᠳᠠ ᠪᠦᠬᠦᠢ ᠨᠠᠢᠮᠠᠨ ᠮᠣᠷᠢ ᠪᠠᠨ ᠠᠯᠳᠠᠵᠣ ᠡᠷᠢᠯ ᠪᠣᠯᠵᠣ ᠵᠦᠳᠡᠵᠦ ᠪᠠᠶᠢᠬᠤ ᠳᠤ ᠬᠡᠬᠦᠦ ᠰᠠᠭᠠᠵᠣ ᠪᠠᠶᠢᠭᠰᠠᠨ ᠪᠣᠭᠤᠷᠴᠦ ᠳᠠᠭᠠᠷᠠᠯᠳᠣᠵᠣ ︽ᠡᠷ᠎ᠡ ᠶᠢᠨ ᠮᠣᠩ ᠠᠳᠠᠯᠢᠬᠠᠨ ᠪᠢᠰᠢᠦ︾ ᠭᠡᠵᠦ ᠰᠠᠭᠠᠯᠢ ᠶᠢᠨ ᠰᠠᠭᠤᠯᠠᠭ᠎ᠠ ᠪᠠᠨ ᠬᠡᠬᠡᠷ᠎ᠡ ᠬᠠᠶᠠᠵᠣ ᠳᠡᠮᠦᠵᠢᠨ ᠢ ᠬᠠᠪᠰᠣᠷᠣᠨ ᠡᠷᠢᠯ ᠳᠤ ᠶᠠᠪᠣᠭᠰᠠᠠ ᠰᠠᠶᠢᠬᠠᠨ ᠦᠯᠢᠬᠡᠷ ᠪᠠᠶᠢᠳᠠᠭ᠂ ᠡᠨᠡ ᠪᠣᠯ ᠳᠠᠷᠣᠢ ︽ᠳᠡᠮᠦᠵᠢᠨ ᠪᠣᠭᠤᠷᠴᠦ ᠶᠢᠨ ᠨᠦᠬᠦᠷᠯᠡᠭᠰᠡᠨ︾ ᠳᠡᠦᠬᠡᠨ ᠦᠯᠢᠬᠡᠷ ᠪᠣᠯᠣᠨ᠎ᠠ᠃ ︽ᠳᠡᠮ ᠳᠡᠮ ᠢᠶᠠᠷ ᠢᠶᠠᠨ ᠳᠡᠭᠡᠰᠦ ᠡᠷᠴᠢᠮ ᠢᠶᠠᠷ ᠢᠶᠠᠨ︾ ᠭᠡᠳᠡᠭ ᠢᠶᠠᠷ ᠪᠣᠰᠣᠳ ᠢ ᠬᠠᠪᠰᠣᠷᠴᠦ ᠳᠡᠮᠵᠢᠬᠦ᠂ ᠨᠢᠭᠡᠨ ᠳᠡᠭᠡᠨ ᠳᠣᠰᠠ ᠳᠡᠮ ᠪᠣᠯᠬᠤ ᠪᠣᠯ ᠮᠣᠩᠭᠤᠯ ᠤᠨ ᠰᠠᠶᠢᠬᠠᠨ ᠵᠠᠩ ᠶᠣᠮ᠃ ᠵᠠᠯᠠᠭᠤᠴᠣᠳ ᠪᠠᠭᠠᠴᠣᠳ ᠡᠨᠡᠬᠦ ᠦᠭᠬᠢᠶᠡᠮᠦᠷᠴᠢ ᠰᠠᠶᠢᠬᠠᠨ ᠵᠠᠩ ᠢᠶᠠᠨ ᠵᠠᠯᠭᠠᠮᠵᠢᠯᠠᠨ ᠬᠠᠳᠠᠭᠠᠯᠠᠵᠣ ᠶᠠᠪᠣᠬᠤ ᠨᠢ ᠵᠦᠢᠳᠡᠢ᠃      ᠪᠡᠶ᠎ᠡ ᠪᠦᠬᠡ ᠠᠴᠠ ᠰᠡᠳᠬᠢᠯ ᠪᠦᠬᠡ ᠪᠠᠶᠢᠬᠤ ᠶᠢᠨ ᠣᠴᠢᠷ      ᠳᠦᠷᠪᠡᠨ ᠦᠩᠬᠡ ᠳᠠᠪᠣᠨ ᠬᠠᠷᠢ ᠶᠢᠰᠦᠨ ᠬᠡᠯᠡᠳᠡᠨ ᠣᠯᠣᠰ ᠢ ᠨᠢᠬᠡ ᠵᠢᠯᠣᠭᠤᠨ ᠳᠣᠣᠷ᠎ᠠ ᠡᠪᠬᠡᠭᠰᠡᠨ ᠮᠣᠩᠭᠤᠯᠴᠣᠳ ᠤᠨ ᠠᠷᠪᠠᠨ ᠭᠤᠷᠪᠠᠳᠣᠭᠠᠷ ᠵᠠᠭᠤᠨ ᠤ ᠳᠡᠦᠬᠡ ᠶᠢ ᠪᠠᠷᠠᠯᠠᠬᠤ ᠳᠤ ᠡᠷᠡᠮᠡᠬᠡᠢ ᠶᠢᠨ ᠬᠦᠴᠦᠨ ᠳᠤ ᠳᠡᠭᠷᠢ ᠶᠢᠨ ᠳᠣᠣᠷᠠᠬᠢ ᠶᠢ ᠡᠵᠡᠯᠡᠭᠰᠡᠨ ᠪᠣᠰᠣ ᠡᠷᠳᠡᠮ ᠤᠨ ᠬᠦᠴᠦᠨ ᠳᠤ ᠡᠵᠡᠯᠡᠭᠰᠡᠨ ᠭᠡᠳᠡᠭ ᠢ ᠳᠣᠳᠣ ᠣᠯᠵᠣ ᠬᠠᠷᠠᠨ᠎ᠠ᠃ ᠴᠢᠩᠬᠢᠰ ᠬᠠᠭᠠᠨ ᠪᠠᠷᠠᠭᠤᠨᠰᠢ ᠵᠣᠯᠠᠷᠠᠭᠰᠠᠨ ᠳᠠᠶᠢᠨ ᠤ ᠵᠣᠷᠢᠯᠭ᠎ᠠ ᠶᠢᠨ ᠳᠣᠬᠠᠢ ︽ᠬᠤᠳᠠᠯᠳᠣᠭᠠᠴᠢᠨ ᠪᠠ ᠡᠯᠴᠢ ᠠᠯᠠᠭᠰᠠᠨ ᠶᠠᠯ᠎ᠠ ᠶᠢ ᠠᠰᠠᠭᠤᠵᠣ ᠦᠰ ᠢ ᠦᠰᠯᠡᠨ ᠬᠢᠰᠠ ᠶᠢ ᠬᠢᠰᠠᠯᠠᠵᠣ︾᠂ ︽ᠬᠠᠷᠭᠠᠮ᠎ᠠ ᠰᠠᠶᠢᠳᠦ ᠠᠭᠳᠠ ᠪᠠ ᠬᠠᠴᠠᠷ ᠭᠤᠸ᠎ᠠ ᠦᠬᠢᠳ ᠢ ᠨᠢ ᠣᠯᠵᠠᠯᠠᠬᠤ︾ ᠪᠠᠷ ᠬᠢᠭᠰᠡᠨ ᠭᠡᠵᠦ ᠶᠠᠷᠢᠪᠠᠯ ᠳᠠᠶᠢᠨ ᠪᠠᠶᠢᠯᠳᠣᠭᠠᠨ ᠪᠣᠯᠬᠤ ᠳᠤ ᠬᠦᠮᠦᠨ ᠦᠬᠦᠵᠦ ᠰᠢᠷᠬᠠᠳᠣᠬᠤ ᠨᠢ ᠯᠠᠪᠳᠠᠢ᠂ ᠳᠡᠭᠡᠬᠦ ᠳᠤ ᠠᠯᠠᠵᠣ ᠨᠢᠳᠦᠯᠬᠦ ᠶᠢ ᠭᠤᠣᠯ ᠪᠣᠯᠭᠠᠭᠰᠠᠨ ᠪᠢᠰᠢ ᠬᠠᠷᠢᠨ ᠳᠦᠷᠦ ᠶᠢ ᠨᠢ ᠵᠠᠰᠠᠵᠣ ᠳᠦᠮᠡᠨ ᠢ ᠨᠢ ᠴᠡᠭᠴᠡᠯᠡᠬᠦ ᠪᠠᠷ ᠭᠤᠣᠯᠳᠠᠵᠣ ᠮᠦᠩᠬᠡ ᠳᠡᠭᠷᠢ ᠶᠢᠨ ᠬᠦᠴᠦ ᠶᠢ ᠬᠦᠷᠭᠡᠭᠰᠡᠨ ᠪᠠᠶᠢᠭ᠎ᠠ ᠶᠣᠮ᠃ ᠡᠨᠡᠬᠦ ᠮᠦᠩᠬᠡ ᠳᠡᠭᠷᠢ ᠶᠢᠨ ᠬᠦᠴᠦᠨ ᠳᠤ ︽ᠪᠠᠭᠠᠳᠣᠷ ᠬᠦᠴᠦ︾ ᠪᠠᠶᠢᠬᠤ ᠶᠢᠨ ᠬᠠᠮᠳᠣ ︽ᠪᠢᠯᠢᠭ ᠤᠨ ᠬᠦᠴᠦ︾ ᠴᠦ ᠪᠠᠶᠢᠳᠠᠭ᠃ ᠪᠠᠭᠠᠳᠣᠷ ᠬᠦᠴᠦ ᠪᠣᠯ ᠪᠡᠶ᠎ᠡ ᠶᠢᠨ ᠬᠦᠴᠦᠰ᠂ ᠪᠢᠯᠢᠭ ᠤᠨ ᠬᠦᠴᠦ ᠪᠣᠯ ᠣᠶᠣᠨ ᠤ ᠳᠠᠯᠠᠰᠲᠦ᠂ ᠮᠣᠩᠭᠤᠯ ᠬᠦᠮᠦᠨ ᠳᠤ ᠮᠦᠩᠬᠡ ᠳᠡᠭᠷᠢ ᠡᠨᠡ ᠬᠤᠶᠠᠷ ᠬᠦᠴᠦ ᠶᠢ ᠰᠣᠶᠣᠷᠬᠠᠨ ᠦᠭᠳᠡᠭ ᠶᠣᠮ ᠪᠠᠶᠢᠨ᠎ᠠ᠃ ᠴᠢᠩᠬᠢᠰ ᠬᠠᠭᠠᠨ ᠤ ᠴᠡᠷᠢᠭ ︽ᠶᠡᠷᠦ ᠶᠢᠨ ᠦᠶᠡᠰ ᠠᠷᠠᠳ ᠳᠦᠮᠡᠨ ᠲᠠᠢ ᠬᠠᠮᠳᠣ ᠪᠠᠶᠢᠬᠤ ᠳᠤ ᠠᠯᠠᠭ ᠦᠨᠢᠶ᠎ᠡ ᠮᠡᠳᠦ ᠨᠣᠮᠣᠬᠠᠨ᠂ ᠠᠯᠠᠯᠳᠣᠬᠤ ᠳᠠᠶᠢᠨ ᠳᠤ ᠣᠷᠣᠬᠤ ᠦᠶ᠎ᠡ ᠠᠪᠠ ᠶᠢᠨ ᠬᠠᠷᠴᠠᠭᠠᠢ ᠰᠢᠬ ᠰᠢᠷᠦᠬᠦᠨ ᠪᠠᠶᠢᠭᠰᠠᠨ︾ ᠪᠠᠶᠢᠵᠠᠢ᠃ ᠮᠣᠩᠭᠤᠯᠴᠣᠳ ᠤᠨ ᠡᠷᠬᠢᠮᠯᠡᠳᠡᠭ ︽ᠡᠷ᠎ᠡ ᠶᠢᠨ ᠭᠤᠷᠪᠠᠨ ᠨᠠᠭᠠᠳᠣᠮ︾ ᠢᠶᠠᠷ ᠠᠪᠴᠣ ᠬᠡᠯᠡᠪᠡᠯ᠂ ᠪᠦᠬᠡ ᠪᠠᠷᠢᠯᠳᠣᠬᠤ᠂ ᠮᠣᠷᠢ ᠣᠷᠣᠯᠳᠣᠬᠤ᠂ ᠰᠣᠷ ᠬᠠᠷᠪᠣᠬᠤ ᠨᠢ ᠵᠦᠪᠬᠡᠨ ᠡᠷ᠎ᠡ ᠳᠡᠩᠬᠡᠬᠡ ᠶᠢᠨ ᠰᠢᠯᠭᠠᠯᠳᠠ ᠪᠢᠰᠢ ᠬᠠᠷᠢᠨ ᠣᠷ᠎ᠠ ᠠᠪᠢᠶᠠᠰ ᠡᠷ᠎ᠡ ᠳᠡᠩᠬᠡᠬᠡ ᠶᠢᠨ ᠬᠤᠣᠰᠯᠠᠭᠰᠠᠨ ᠰᠢᠯᠭᠠᠯᠳᠠ ᠪᠣᠯᠬᠤ ᠶᠣᠮ᠃ ᠮᠡᠳᠡᠭᠡᠵᠢ ᠪᠦᠬᠡ ᠪᠠᠷᠢᠯᠳᠣᠬᠤ ᠨᠢ ᠰᠠᠶᠢᠨ ᠡᠷ᠎ᠡ ᠶᠢᠨ ᠬᠦᠴᠦ ᠳᠣᠷᠪᠢ ᠪᠠᠨ ᠰᠣᠷᠢᠬᠤ ᠦᠵᠡᠯᠴᠡᠭᠡᠨ ᠪᠠᠶᠢᠭᠰᠠᠨ ᠴᠦ ᠳᠡᠬᠦᠨ ᠳᠤ ︽ᠪᠦᠬᠡ ᠶᠢᠨ ᠮᠡᠭᠡ︾ ᠭᠡᠳᠡᠭ ︽ᠣᠷ᠎ᠠ ᠠᠪᠢᠶᠠᠰ︾ ᠤᠨ ᠰᠣᠷᠢᠭ᠎ᠠ ᠳᠠᠭᠠᠵᠣ ᠪᠠᠶᠢᠳᠠᠭ᠃ ᠪᠦᠬᠡ ᠶᠢᠨ ᠮᠡᠭᠡ ᠳᠤ ᠬᠤᠮᠨᠤᠭ᠎ᠠ᠂ ᠠᠴᠢᠶ᠎ᠠ᠂ ᠳᠡᠭᠡᠭᠡ᠂ ᠡᠬᠦᠷᠦᠬᠡ᠂ ᠬᠦᠩᠬᠦᠬᠡ᠂ ᠵᠠᠶᠢᠯᠠᠭ᠎ᠠ᠂ ᠰᠢᠬᠦᠷᠦᠬᠡ᠂ ᠳᠠᠳᠠᠭ᠎ᠠ ᠁ ᠬᠡᠵᠦ ᠣᠯᠠᠨ ᠮᠡᠭᠡ ᠪᠠᠶᠢᠳᠠᠭ ᠨᠢ ᠪᠦᠷ ᠴᠦ ᠣᠢ ᠪᠢᠯᠢᠭ ᠤᠨ ᠰᠣᠷᠢᠭ᠎ᠠ ᠮᠦᠨ᠃ ︽ᠬᠦᠴᠦ ᠪᠠᠷ ᠵᠠᠭᠤᠨ ᠵᠢᠩ ᠢ ᠡᠷᠬᠦᠬᠦ ᠳᠤ ᠠᠷᠭ᠎ᠠ ᠪᠠᠷ ᠮᠢᠩᠭᠠᠨ ᠵᠢᠩ ᠢ ᠡᠷᠬᠦᠨ᠎ᠡ︾ ᠭᠡᠳᠡᠭ᠃ ᠮᠣᠩᠭᠤᠯ ᠪᠦᠬᠡ ᠶᠢᠨ ᠳᠣᠮᠤᠭ ᠲᠤ ᠠᠷᠭ᠎ᠠ ᠪᠠᠷ ᠬᠠᠶᠠᠭᠰᠠᠨ ᠣᠯᠠᠮᠵᠢᠯᠠᠯ ᠶᠠᠷᠢᠶ᠎ᠠ ᠮᠠᠰᠢ ᠳᠦᠬᠡᠮᠡᠯ ᠶᠠᠷᠢᠭᠳᠠᠵᠣ ᠪᠠᠶᠢᠳᠠᠭ᠃ ᠮᠣᠩᠭᠤᠯᠴᠣᠳ ᠶᠡᠷᠦᠨᠢ ᠬᠠᠷ᠎ᠠ ᠬᠦᠴᠦ ᠪᠠᠷ ᠦᠵᠡᠯᠴᠡᠵᠦ ᠪᠠᠶᠢᠭ᠎ᠠ ᠦᠬᠡᠢ᠂ ᠪᠦᠬᠡ ᠶᠢᠨ ᠮᠡᠭᠡ ᠬᠢᠴᠡ ᠭᠡᠳᠡᠭ ᠨᠢ ᠣᠢ ᠪᠢᠯᠢᠭ ᠬᠤᠷᠴᠠ ᠣᠬᠠᠭᠠᠨ ᠪᠠ ᠳᠡᠩᠬᠡᠬᠡ ᠳᠠᠮᠢᠷ ᠤᠨ ᠣᠶᠠᠯᠳᠣᠭᠰᠠᠨ ᠦᠵᠡᠯᠴᠡᠬᠡᠨ ᠪᠣᠯᠣᠨ᠎ᠠ᠃ ᠠᠯᠳᠠᠷᠳᠣ ᠵᠣᠬᠢᠶᠠᠯᠴᠢ ᠢᠨᠵᠠᠨᠨᠠᠰᠢ ︽ᠪᠡᠶ᠎ᠡ ᠪᠠᠭᠠᠳᠣᠷ ᠪᠣᠯᠪᠠᠰᠣ ᠨᠢᠬᠡᠨ ᠦᠶ᠎ᠡ ᠶᠢᠨ ᠪᠠᠭᠠᠳᠣᠷ᠂ ᠪᠢᠯᠢᠭ ᠪᠠᠭᠠᠳᠣᠷ ᠪᠣᠯᠪᠠᠰᠣ ᠳᠦᠮᠡᠨ ᠦᠶ᠎ᠡ ᠶᠢᠨ ᠪᠠᠭᠠᠳᠣᠷ︾ ᠭᠡᠵᠦ ᠰᠤᠷᠭᠠᠭᠰᠡᠨ ᠪᠠᠶᠢᠳᠠᠭ᠂ ᠴᠢᠩᠬᠢᠰ ᠬᠠᠭᠠᠨ ᠤ ᠪᠢᠯᠢᠭ ᠰᠣᠷᠭᠠᠯ ᠳᠤ ᠪᠠᠰᠠ ︽ᠪᠡᠶ᠎ᠡ ᠪᠦᠬᠡ ᠪᠦᠭᠡᠰᠦ ᠭᠠᠭᠴᠠ ᠶᠢ ᠢᠯᠡᠶᠣ᠂ ᠰᠡᠳᠬᠢᠯ ᠪᠦᠬᠡ ᠪᠦᠬᠡᠰᠦ ᠣᠯᠠᠨ ᠢ ᠢᠯᠠᠶᠣ︾ ᠭᠡᠰᠡᠨ ᠪᠠᠶᠢᠳᠠᠭ᠃ ᠡᠨᠡ ᠪᠥᠬᠦᠨ ᠠᠴᠠ ᠦᠵᠡᠬᠦ ᠳᠤ ᠮᠤᠩᠭᠤᠯᠴᠤᠳ ᠤᠨ ᠰᠤᠷᠭᠠᠯ ᠳᠤ ᠪᠡᠶ᠎ᠡ ᠪᠦᠬᠡ ᠠᠴᠠ ᠰᠡᠳᠬᠢᠯ ᠪᠦᠬᠡ ᠪᠠᠶᠢᠬᠤ ᠶᠢ ᠠᠯᠢ ᠡᠷᠲᠡ ᠠᠴᠠ ᠡᠷᠬᠢᠮᠯᠡᠭᠰᠡᠭᠡᠷ ᠢᠷᠡᠵᠠᠢ᠃      ᠬᠡᠯᠨ ᠰᠠᠶᠢᠳᠠᠢ ᠪᠣᠯ ᠬᠦᠯ ᠰᠠᠶᠢᠳᠠᠢ ᠪᠠᠶᠢᠬᠤ ᠶᠢᠨ ᠣᠴᠢᠷ      ᠡᠬᠡᠴᠦᠦᠯ ᠪᠣᠶᠣ ᠭᠡᠷ ᠤᠨ ᠠᠬᠠᠮᠠᠳ ᠲᠤ ᠠᠪᠴᠣ ᠬᠡᠯᠡᠪᠡᠯ ᠬᠡᠦᠬᠡᠳ ᠤᠨ ᠬᠠᠮᠤᠭ ᠠᠩᠬᠠᠨ ᠤ ᠪᠠᠭᠰᠢ ᠭᠡᠵᠦ ᠬᠡᠯᠡᠵᠦ ᠪᠠᠶᠢᠭ᠎ᠠ ᠨᠢ ᠳᠡᠳᠡ ᠬᠡᠦᠬᠡᠳ ᠲᠤ ᠬᠤᠷᠸ᠎ᠠ ᠲᠠᠢ ᠳᠠᠨᠢᠯᠴᠠᠬᠤ ᠬᠠᠮᠤᠭ ᠠᠩᠬᠠᠨ ᠤ ᠵᠦᠢᠯᠡᠰ ᠢ ᠵᠢᠭᠠᠵᠣ ᠦᠭᠴᠦ ᠪᠠᠶᠢᠭ᠎ᠠ ᠶᠣᠮ᠃ ᠬᠡᠦᠬᠡᠳ ᠨᠢᠯᠬ᠎ᠠ ᠪᠠᠯᠴᠢᠷ ᠪᠠᠶᠢᠬᠤ ᠳᠠᠭᠠᠨ ᠠᠪᠢᠶ᠎ᠠ ᠶᠢ ᠪᠦᠳᠦᠨ ᠭᠠᠷᠭᠠᠵᠣ ᠴᠢᠳᠠᠬᠤ ᠦᠬᠡᠢ ᠪᠠᠶᠢᠵᠦ᠂ ᠠᠩᠬᠠᠯᠠᠨ ᠬᠡᠯᠨ ᠳᠤ ᠣᠷᠣᠬᠤ ᠳᠤ ᠮᠣᠩᠭᠤᠯ ᠦᠬᠡ ᠬᠡᠯᠨ ᠪᠣᠯ ᠨᠡᠩ ᠬᠡᠯᠨ ᠣᠷᠢᠶᠠᠯᠳᠣᠬᠤ ᠠᠪᠢᠶ᠎ᠠ ᠣᠯᠠᠨ ᠪᠠᠶᠢᠳᠠᠭ ᠠᠴᠠ ᠵᠦᠪ ᠠᠪᠢᠶᠠᠯᠠᠵᠣ ᠴᠢᠳᠠᠬᠤ ᠦᠬᠡᠢ ᠬᠦᠴᠢᠷᠳᠡᠳᠡᠭ᠃ ᠵᠢᠱᠢᠶᠡᠯᠡᠬᠦ ᠳᠤ ᠠᠪᠢᠶᠠᠯᠠᠬᠤ ᠦᠶᠡᠰ ᠵᠦᠬᠡᠯᠡᠨ᠂ ᠳᠠᠩᠨᠠᠢ ᠡᠷᠬᠦᠭᠳᠡᠵᠦ ᠬᠠᠮᠠᠷ ᠤᠨ ᠬᠦᠨᠳᠡᠢ ᠶᠢ ᠪᠦᠭᠯᠡᠨ᠂ ᠬᠡᠯᠡᠨ ᠤ ᠦᠵᠦᠬᠦᠷ ᠤᠨ ᠳᠣᠷᠬᠢᠬᠤ ᠳᠠᠭᠤᠳᠣ ︽ᠷ᠊︾ ᠬᠡᠶᠢᠬᠦᠯᠦᠭᠴᠢ ᠠᠪᠢᠶ᠎ᠠ ᠪᠠ ᠠᠪᠢᠶᠠᠯᠠᠬᠤ ᠳᠤ ᠵᠦᠬᠡᠯᠡᠨ᠂ ᠳᠠᠩᠨᠠᠢ ᠳᠡᠭᠡᠭᠰᠢᠯᠡᠵᠦ ᠬᠠᠮᠠᠷ ᠤᠨ ᠬᠦᠨᠳᠡᠢ ᠶᠢᠨ ᠰᠦᠪᠡ ᠶᠢ ᠬᠠᠭᠠᠬᠤ ᠳᠠᠭᠤᠨ ᠬᠦᠪᠴᠢ ᠶᠢᠨ ︽ᠯ᠊︾ ᠬᠡᠶᠢᠬᠦᠯᠦᠭᠴᠢ ᠠᠪᠢᠶ᠎ᠠ ᠶᠢ ᠬᠠᠷᠢᠯᠴᠠᠨ ᠬᠤᠳᠬᠤᠬᠤ᠂ ᠬᠡᠯᠡᠨ ᠤ ᠣᠷᠢᠳᠣᠭᠤᠷ ᠬᠡᠰᠡᠭ ᠤᠨ ᠬᠠᠮᠵᠢᠨ ᠱᠦᠷᠬᠦᠬᠡᠬᠦ ᠳᠦᠷᠢᠯᠳᠡ ᠲᠠᠢ ︽ᠴ᠊︾ ᠬᠡᠶᠢᠬᠦᠯᠦᠭᠴᠢ ᠪᠠ ᠬᠡᠯᠡᠨ ᠤ ᠣᠷᠢᠳᠣᠭᠤᠷ ᠬᠠᠮᠵᠢᠨ ᠱᠦᠷᠬᠦᠬᠡᠬᠦ ᠳᠦᠷᠢᠯᠳᠡ ᠦᠬᠡᠢ ︽ᠵ᠊︾ ᠬᠡᠶᠢᠬᠦᠯᠦᠭᠴᠢ ᠶᠢ ᠬᠤᠳᠬᠤᠬᠤ ᠮᠡᠳᠦᠴᠢᠯᠡᠨ ᠪᠠᠶᠢᠳᠠᠭ᠂ ᠭᠡᠬᠦ ᠳᠤ ᠮᠤᠩᠭᠤᠯᠴᠤᠳ ᠡᠷᠳᠡ ᠴᠠᠭ ᠠᠴᠠ ᠠᠪᠣᠭᠠᠳ ᠬᠡᠯᠨ ᠳᠤ ᠣᠷᠣᠬᠤ ᠬᠡᠦᠬᠡᠳ ᠢ ᠠᠩᠬᠠᠯᠨᠨ ᠳᠠᠰᠬᠠᠬᠤ ᠳᠠᠭᠠᠨ ︽ᠬᠡᠯᠨ ᠳᠤ ᠣᠷᠣᠭᠤᠯᠬᠤ ᠦᠬᠡ︾ ᠭᠡᠳᠡᠭ ᠳᠦᠬᠦᠮ ᠳᠣᠬᠢᠶᠠᠨ ᠤ ᠦᠬᠡ ᠪᠠᠷ ᠰᠣᠷᠭᠠᠵᠣ ᠨᠡᠯᠢᠶᠡᠳ ᠦᠬᠡ ᠬᠡᠯᠡᠨ ᠤ ᠮᠡᠳᠡᠷᠡᠮᠵᠢ ᠲᠠᠢ ᠪᠣᠯᠵᠣ ᠬᠡᠯᠡᠨ ᠤ ᠴᠣᠯᠴᠠᠷᠠᠭ᠎ᠠ ᠨᠢ ᠪᠦᠷᠢᠨ ᠭᠠᠷᠣᠭᠠᠳᠣᠢ ᠴᠤ ᠠᠪᠢᠶᠠᠯᠠᠵᠣ ᠴᠢᠳᠠᠬᠤ ᠦᠶ᠎ᠡ ᠳᠤ ᠰᠠᠶ᠋ᠢ ᠳᠠᠩ ᠦᠬᠡ ᠶᠢ ᠬᠡᠯᠡᠬᠦᠯᠵᠦ ᠰᠣᠷᠭᠠᠳᠠᠭ ᠪᠠᠶᠢᠭᠰᠠᠨ ᠶᠣᠮ᠃ ᠬᠡᠯᠨ ᠳᠤ ᠣᠷᠣᠭᠤᠯᠬᠤ ᠳᠦᠬᠦᠮ ᠳᠣᠬᠢᠶᠠᠨ ᠤ ᠦᠬᠡᠨ ᠳᠤ ᠪᠣᠳᠠᠭ᠎ᠠ ᠢᠳᠡᠬᠦ ᠶᠢ ︽ᠠᠮᠨ ᠠᠮᠠ︾᠂ ᠬᠦᠬᠦᠬᠦᠯᠬᠦ ᠳᠤ ᠳᠠᠭᠤᠳᠠᠬᠤ ᠶᠢ ︽ᠡᠵᠢ ᠡᠵᠢ︾᠂ ᠶᠠᠮᠠᠷ ᠨᠢᠬᠡᠨ ᠬᠡᠷᠡᠭ ᠣᠴᠢᠷ ᠢ ᠬᠢᠵᠦ ᠪᠣᠯᠬᠤ ᠦᠬᠡᠢ ᠢᠴᠢᠬᠦᠷᠢ ᠲᠠᠢ ᠭᠡᠰᠡᠨ ᠢ ︽ᠠᠶᠢᠯᠤᠣ ᠠᠶᠢᠯᠤᠣ ᠪᠣᠯᠬᠤ ᠦᠬᠡᠢ ᠰᠢᠦ︾ ᠭᠡᠬᠦ ᠮᠡᠳᠦ ᠪᠣᠢ᠃ ᠡᠳᠡᠭᠡᠷ ᠦᠬᠡ ᠨᠢ ᠬᠡᠳᠦ᠋ᠢᠪᠡᠷ ᠳᠠᠩ ᠠᠪᠢᠶ᠎ᠠ ᠪᠠᠷ ᠪᠦᠳᠦᠭᠰᠡᠨ ᠪᠣᠶᠣ ᠳᠦᠬᠦᠮ ᠠᠪᠢᠶᠠᠯᠠᠪᠣᠷᠢ ᠲᠠᠢ ᠦᠬᠡ ᠪᠠᠶᠢᠭᠰᠠᠨ ᠴᠤ ᠵᠣᠬᠢᠬᠤ ᠨᠢᠬᠡ ᠣᠳᠬ᠎ᠠ ᠶᠢ ᠢᠯᠡᠳᠭᠡᠵᠦ ᠶᠠᠮᠠᠷ ᠨᠢᠬᠡᠨ ᠬᠡᠷᠡᠭ ᠤᠴᠢᠷ᠂ ᠬᠦᠳᠡᠯᠬᠡᠬᠡᠨ ᠪᠠᠶᠢᠳᠠᠯ ᠢ ᠬᠡᠦᠬᠡᠳ ᠲᠤ ᠬᠡᠯᠡᠨ ᠤ ᠳᠣᠬᠢᠶ᠎ᠠ ᠪᠠᠷ ᠣᠶᠢᠯᠠᠭᠠᠭᠤᠯᠵᠣ ᠳᠡᠶᠢᠯᠬᠦ ᠶᠣᠮ᠂ ᠵᠢᠱᠢᠶᠡᠯᠡᠬᠦ ᠳᠤ ︽ᠠᠶᠢᠯᠳᠠ ᠠᠶᠢᠯᠳᠠ ᠭᠡᠶ᠎ᠡ︾ ᠭᠡᠰᠡᠨ ᠦᠬᠡ ᠨᠢ ᠳᠣᠮᠣ ᠬᠦᠮᠦᠨ ᠳᠤ ᠪᠣᠯ ᠣᠶᠢᠯᠠᠭᠠᠵᠣ ᠶᠠᠳᠠᠬᠤ ᠳᠦᠬᠦᠮ ᠠᠪᠢᠶ᠎ᠠ ᠪᠠᠶᠢᠭᠰᠠᠨ ᠴᠤ ᠬᠡᠦᠬᠡᠳ ᠲᠤ ᠡᠨᠡ ᠦᠬᠡ ᠶᠢ ᠰᠣᠷᠭᠠᠮᠠᠭᠴᠠ ᠠᠶᠢᠯ ᠳᠣᠭᠤᠷᠢᠬᠤ ᠭᠡᠵᠦ ᠪᠠᠶᠢᠨ᠎ᠠ ᠭᠠᠳᠠᠨ᠎ᠠ ᠠᠶᠢᠯᠴᠢᠯᠠᠨ᠎ᠠ ᠭᠡᠵᠦ ᠪᠠᠶᠢᠨ᠎ᠠ ᠭᠡᠵᠦ ᠮᠡᠳᠡᠭᠡᠳ ᠴᠢᠨᠦ ᠦᠭᠡᠳᠡ ᠠᠴᠠ ᠮᠦᠯᠬᠦᠨ ᠢᠷᠡᠳᠡᠭ᠂ ᠡᠭᠦᠨ ᠤ ᠳᠠᠷᠣᠢ ︽ᠠᠶᠢᠯ︾ ᠭᠡᠬᠦ ᠣᠬᠠᠭᠳᠠᠬᠤᠨ ᠤ ᠳᠣᠬᠠᠢ ᠠᠩᠬᠠᠨ ᠤ ᠰᠠᠭᠤᠭᠳᠠᠯ ᠦᠭᠴᠦ ᠬᠤᠵᠢᠮ ᠠᠶᠢᠯ ᠳᠣᠭᠤᠷᠢᠬᠤ ᠭᠡᠵᠦ ᠪᠦᠳᠦᠨ ᠬᠡᠯᠡᠬᠦ ᠶᠢᠨ ᠣᠷᠢᠳᠠᠯ ᠪᠣᠯᠵᠣ ᠪᠠᠶᠢᠭ᠎ᠠ ᠶᠣᠮ᠃      ᠮᠣᠩᠭᠤᠯᠴᠣᠳ ᠬᠡᠯᠨ ᠵᠦᠭᠰᠢᠷᠡᠬᠦᠯᠬᠦ ᠦᠬᠡ ᠶᠢ ᠡᠬᠡᠳᠡᠷᠡᠭᠡ ᠭᠠᠷᠭᠠᠬᠤ ᠦᠬᠡ᠂ ᠬᠡᠯᠨ ᠵᠠᠰᠠᠬᠤ ᠦᠬᠡ ᠭᠡᠬᠦ ᠮᠡᠳᠦ ᠪᠠᠷ ᠬᠡᠯᠡᠳᠡᠭ᠃ ᠬᠡᠯᠨ ᠳᠤ ᠣᠷᠣᠭᠠᠳᠣᠢ ᠬᠡᠦᠬᠡᠳ ᠢ ᠳᠡᠭᠡᠷᠡᠬᠢ ᠮᠡᠳᠦ ᠳᠦᠬᠦᠮ ᠠᠪᠢᠶᠠᠨ ᠦᠬᠡ ᠪᠠᠷ ᠬᠡᠯᠡᠬᠦᠯᠵᠦ ᠰᠣᠷᠭᠠᠳᠠᠭ ᠪᠠᠶᠢᠭᠰᠠᠨ ᠪᠣᠯ ᠨᠡᠯᠢᠶᠡᠳ ᠳᠣᠮᠣ ᠪᠣᠯᠣᠭᠠᠳ ᠢᠷᠡᠬᠦ ᠪᠠᠷ ᠨᠢ ᠴᠡᠭᠡᠵᠢᠯᠡᠬᠦ ᠳᠤ ᠳᠦᠬᠦᠮ ᠬᠤᠷᠰᠢᠯ ᠠᠶᠢᠵᠠᠮ ᠲᠠᠢ᠂ ᠣᠷᠮ᠎ᠠ ᠶᠢ ᠬᠦᠭᠵᠢᠬᠡᠬᠦ ᠦᠬᠡ ᠴᠡᠭᠡᠵᠢᠯᠡᠬᠦᠯᠵᠦ ᠰᠣᠷᠭᠠᠳᠠᠭ᠃      ᠲᠠᠯ᠎ᠠ ᠳᠡᠭᠡᠷ᠎ᠡ ᠲᠠᠪᠢᠨ ᠲᠠᠪᠣᠨ ᠲᠠᠷᠭᠤᠨ ᠲᠠᠷᠪᠠᠭ᠎ᠠ ᠪᠠᠶᠢᠨ᠎ᠠ      ᠡᠨᠡ ᠲᠠᠪᠢᠨ ᠲᠠᠪᠣᠨ ᠲᠠᠷᠭᠤᠨ ᠲᠠᠷᠪᠠᠭ᠎ᠠ ᠶᠢ      ᠲᠠᠪᠢᠨ ᠲᠠᠪᠣᠨ ᠲᠠᠷᠭᠤᠨ ᠲᠠᠷᠪᠠᠭ᠎ᠠ ᠭᠡᠬᠦ ᠥᠭᠡᠢ      ᠥᠭᠡᠷ᠎ᠡ ᠶᠠᠮᠠᠷ ᠲᠠᠪᠢᠨ ᠲᠠᠪᠣᠨ ᠲᠠᠷᠭᠤᠨ ᠲᠠᠷᠪᠠᠭ᠎ᠠ ᠶᠢ      ᠲᠠᠪᠢᠨ ᠲᠠᠪᠣᠨ ᠲᠠᠷᠭᠤᠨ ᠲᠠᠷᠪᠠᠭ᠎ᠠ ᠭᠡᠬᠦ ᠪᠣᠢ      ᠳᠡᠨᠳᠡ ᠨᠢᠬᠡ ᠳᠦᠷᠪᠡᠨ      ᠮᠣᠬᠤᠷ ᠬᠦᠬᠡ ᠳᠡᠭᠡ      ᠠᠳᠡ ᠨᠢᠬᠡ ᠳᠦᠷᠪᠡᠨ      ᠮᠣᠬᠤᠷ ᠬᠦᠬᠡ ᠳᠡᠭᠡ      ᠠᠳᠡ ᠳᠡᠨᠳᠡ ᠡᠰᠡ ᠮᠦᠷᠬᠦᠯᠳᠦᠪᠡᠯ      ᠡᠷᠬᠢᠨ ᠳᠡᠭᠡᠷᠡᠡ ᠮᠦᠷᠬᠦᠯᠳᠦᠬᠦ ᠤᠤ      ᠡᠯᠡᠰᠦᠨ ᠳᠡᠭᠡᠷ᠎ᠡ ᠮᠦᠷᠬᠦᠯᠳᠦᠬᠦ ᠤᠤ ᠭᠡᠬᠦ ᠮᠡᠳᠦ ᠶᠢᠨ ᠦᠬᠡ ᠠᠪᠢᠶ᠎ᠠ ᠶᠢ ᠵᠦᠪ ᠳᠣᠳᠣᠷᠬᠠᠢ ᠬᠡᠯᠡᠬᠦ ᠳᠤ ᠵᠣᠷᠢᠭᠤᠯᠣᠯᠳᠠ ᠲᠠᠢ ᠬᠤᠯᠪᠣᠭ᠎ᠠ᠂ ᠨᠠᠭᠠᠳᠣᠮ ᠤᠨ ᠦᠬᠡ ᠡᠯ᠎ᠡ ᠨᠣᠳᠤᠭ ᠤᠨ ᠳᠣᠮᠳᠠ ᠮᠠᠰᠢ ᠳᠦᠬᠡᠮᠡᠯ ᠳᠡᠯᠭᠡᠷᠡᠵᠦ ᠬᠡᠦᠬᠡᠳ ᠤᠨ ᠬᠡᠯᠨ ᠳᠤ ᠣᠷᠣᠬᠤ ᠳᠤ ᠦᠢᠯᠡᠴᠢᠯᠡᠵᠦ ᠪᠠᠶᠢᠳᠠᠭ᠃ ᠨᠢᠯᠬ᠎ᠠ ᠬᠡᠦᠬᠡᠳ ᠬᠦᠯ ᠳᠤ ᠣᠷᠣᠬᠤ ᠳᠤ ︽ᠳᠣᠱᠠ ᠶᠢ ᠨᠢ ᠳᠠᠰᠣᠯᠤᠨ᠎ᠠ︾ ᠭᠡᠵᠦ ᠬᠤᠶᠠᠷ ᠬᠦᠯ ᠬᠤᠭᠤᠷᠣᠨᠳᠣ ᠨᠢ ᠬᠠᠶᠢᠴᠢ ᠪᠠᠷ ᠬᠠᠶᠢᠴᠢᠯᠠᠬᠤ ᠳᠦᠷᠢ ᠭᠠᠷᠭᠠᠵᠣ ᠡᠷᠯᠢᠭ ᠠᠴᠠ ᠢᠷᠡᠭᠰᠡᠨ ᠳᠣᠱᠠ ᠶᠢ ᠳᠠᠰᠣᠯᠵᠣ ᠪᠠᠶᠢᠨ᠎ᠠ ᠭᠡᠳᠡᠭ᠃ ᠳᠠᠨᠳᠤᠷ ᠮᠦᠨᠳᠦᠷ ᠠᠯᠬᠤᠳᠠᠭ ᠬᠡᠦᠬᠡᠳ ᠳᠣᠱᠠ ᠶᠢ ᠨᠢ ᠳᠠᠰᠣᠯᠴᠢᠬᠠᠪᠠᠯ ᠬᠦᠯ ᠳᠤ ᠣᠷᠣᠬᠤ ᠳᠤ ᠬᠤᠷᠳᠣᠨ ᠪᠣᠯᠳᠠᠭ᠃ ᠬᠡᠯᠨ ᠳᠤ ᠣᠷᠣᠬᠤ ᠨᠢ ᠬᠦᠯ ᠳᠤ ᠣᠷᠣᠬᠤ ᠲᠠᠢ ᠠᠳᠠᠯᠢᠬᠠᠨ ᠢᠶᠠᠷ ᠬᠦᠮᠦᠨ ᠪᠣᠯᠬᠤ ᠶᠢᠨ ᠠᠩᠬᠠᠨ ᠤ ᠬᠦᠮᠦᠵᠢᠯ ᠪᠣᠯᠣᠨ᠎ᠠ᠃  
  
ᠢᠷᠡᠯᠲᠡ᠄ ᠤᠯᠠᠭᠠᠨᠬᠠᠲᠡ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠰᠤᠷᠭᠠᠨ ᠬᠥᠮᠦᠵᠢᠯ ᠤᠨ ᠶᠠᠮᠤᠨ᠄ ᠪᠣᠯᠪᠠᠰᠤᠷᠠᠭᠤᠯᠤᠯ ᠤᠨ ᠪᠠᠶᠢᠭᠤᠯᠤᠮᠵᠢ ᠳᠥᠷᠪᠡᠨ ᠵᠤᠷᠪᠤᠰ ᠳᠦᠷᠢᠮ ᠤᠨ ᠁
ᠰᠤᠳᠤᠨ ︽ᠭᠡᠰᠢᠭᠦᠨ︾ ᠰᠢᠯᠢᠲᠡᠭ ᠵᠠᠬᠢᠷᠤᠯ — ᠨᠠᠷᠠᠠᠭᠡᠷᠡᠯ
ᠰᠤᠷᠤᠯᠭ᠎ᠠ ᠲᠡᠭᠦᠰᠬᠦ ︽ᠨᠦᠬᠦᠨ ᠰᠢᠯᠭᠠᠵᠤ ᠲᠡᠭᠦᠰᠭᠡᠬᠦ ᠰᠢᠯᠭᠠᠯᠲᠠ︾ ᠶᠢ ᠬᠦᠴᠦᠨ ᠥᠬᠡᠶ ᠪᠣᠯᠭᠠᠪᠠᠯ ᠣᠶᠤᠲᠠᠳ ᠁
ᠬᠡᠦᠭᠡᠳ ᠬᠦᠮᠦᠵᠢᠭᠦᠯᠬᠦ ᠤᠷᠠᠯᠢᠭ
ᠬᠤᠲᠠ ᠶᠢᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠤᠳᠤᠷᠢᠳᠤᠯᠭ᠎ᠠ ᠮᠤᠩᠭᠤᠯ ᠰᠤᠷᠭᠠᠭᠤᠯᠢ ᠳᠤ ᠭᠦᠨᠵᠡᠭᠡᠶᠢᠷᠡᠨ ᠰᠤᠷᠭᠠᠨ ᠁
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号